Көп адам мысығы дәл ауырған жерді сезіп, соның үстіне жатып алады деп ойлайды. Бұл әсер кейде өте нанымды көрінеді. Бірақ ғылым бұл құбылысты сәл басқаша түсіндіреді, деп хабарлайды turkystan.kz health.mail.ru-ға сілтеме жасап.
Мысықтардың сезу қабілеті өте жоғары: иіс сезуі адамнан әлдеқайда күшті, дыбысты да өте жоғары жиілікте қабылдай алады, ал мінез-құлық пен дауыс өзгерісін тез байқайды. Адам ауырғанда оның қимылы, тыныс алуы, дауысы, тіпті иісі де өзгереді, мысық соны бірден сезеді.
Бірақ маңыздысы: мысық ауруды «диагноз» қоя алмайды. Ол тек әдеттегі мінез-құлықтан ауытқуды байқайды. Яғни, «бір нәрсе өзгерді» деген сигналды түсінеді, бірақ оның себебін нақты ажырата алмайды.
Ал «дәл ауырған жерге жатады» деген түсінік көбіне қарапайым себептермен түсіндіріледі. Ауырған аймақтарда немесе қабынған тұстарда дене температурасы сәл жоғары болуы мүмкін. Мысықтар болса жылуды жақсы көреді — олардың өз дене температурасы да жоғары (шамамен 38-39°C). Сондықтан ол жылу көзі бар жерге инстинктивті түрде тартылады.
Ғылыми тұрғыдан алғанда, мысықтың емдік әсері дәлелденбеген. Яғни ол ауруды «жазбайды», бірақ адамның көңіл-күйіне жақсы әсер етуі мүмкін.
Зерттеулер мысықпен қарым-қатынас стресс деңгейін төмендетіп, қан қысымын реттеуге көмектесетінін көрсетеді. Бірақ бұл медициналық ем емес, психологиялық және эмоционалдық қолдау.
Қысқасы: мысық сізді «емдемейді», бірақ сіздің жағдайыңыз өзгергенін сезіп, жанында болуға тырысады. Ал кейде дәл сол «жанында болу» өзі-ақ ең жақсы әсер береді.