Елорданың сәулеттік шежіресі мен заманауи даму стратегиясы соны белеске көтерілді. Биылғы абаттандыру жобалары Астананың урбанистік келбетіне жаңа тыныс беріп, қала орталығы мен шеткі аудандардағы демалыс аймақтарының деңгейін біртұтас сапалық стандартқа ұластырды. Адам игілігіне басымдық беретін жаңа қала құрылысы парадигмасы аясында жаяу жүргіншілерге жайлы жолдар мен кедергісіз инклюзивті орта қалыптастыру жұмыстары жүйелі сипат алып отыр. Әлемдік мегаполистердің озық тәжірибесі мен жергілікті ландшафттың өзіндік ерекшелігі ұштасқан бұл трансформация елорданы қолайлы ортаның жаңа символына айналдырды.
Бас қаланың 2035 жылға дейінгі жаңа Бас жоспары бойынша 750-ге жуық аула мен қоғамдық кеңістік абаттандырылады. Биыл шаһарда жаңа саябақтар, жаяу жүргіншілер аймақтары мен демалыс орындары ашылып, негізгі көшелер мен жағалауларды жаңғырту жұмыстары өз жалғасын табуда. Ауқымды көгалдандыру жұмыстары да басталып кетті. Биыл шамамен 173 қоғамдық және аула аумағын абаттандыру, сондай-ақ 1,1 миллионнан астам жасыл желек (көшеттер, бұталар, гүлдер, ағаштар) отырғызу жоспарланып отыр.
Қаладағы ең ірі нысандардың бірі «Мыңжылдық» аллеясындағы жұмыстың бірінші кезеңі басталды. Қала тұрғындары мен қонақтары демалатын көліксіз кеңістіктің ұзындығы 4 шақырымнан асады. Қалалық ортаны дамытуға бағытталған жоба бір мезгілде екі жерде – Қ.Қуанышбаев атындағы Қазақ ұлттық музыкалық-драма театрының маңында және «Нұрлы жол» вокзалының жанында басталды. Жоба аясында вокзал маңындағы саябақ та абаттандырылады. Бұл – серуендеуге, демалуға және қала өміріне арналған жаңа жасыл кеңістік. Сонымен қатар қаланың алғашқы әсерін қалыптастыратын теміржол вокзалы маңындағы парк жобасын іске асыру жоспарлануда.
Аллея алдағы жылдары қаланың қоғамдық кеңістік жүйесінің бір бөлігіне айналмақ. Мұнда көгалдандыруға, жаяу жүргіншілерге ыңғайлы маршруттар ұйымдастыруға және заманауи қалалық ортаны қалыптастыруға ерекше көңіл бөлінеді. Абаттандыру жұмыстары кезең-кезеңімен жүргізілмек, аллеяның жекелеген учаскелері біртіндеп өзара түйісіп, тұтас кеңістікке айналады. Жоспар бойынша «Мыңжылдық» аллеясы елорданың Сулы-жасыл желекті бульвардың жалғасы ретінде үлкен әрі жайлы жасыл саябаққа айналуға тиіс.
Сондай-ақ жақында тұрғындар мен қала қонақтарына арналған заманауи демалыс аймағы Samal Park ашылды. Әл-Фараби даңғылы, Керей мен Жәнібек хандар көшесі және Бұқар Жырау көшелерінің арасында орналасқан бұл саябақ қысқа уақыт ішінде көпшіліктің көңілінен шығып үлгерді.
Жаңа парк өзге демалыс орындарынан ерекше. Тек серуендеуге арналған жолдар ғана емес, мұндағы инфрақұрылым әртүрлі жастағы тұрғындарға ыңғайланып жасалған. Келушілерге барлық қолайлы мүмкіндік қарастырылған. Саябақ аумағында тынығу аймақтары мен орындықтар, жаяу серуендеуге арналған кең жолақтар, шағын көлшік пен көпірлер орналасқан. Балалар ойын алаңының бірнеше түрі бар, көлеңке беретін жасыл желек пен ағаштар егілген.
Сонымен қатар футбол, баскетбол, теннис алаңдары мен workout аймақтары қарастырылған. Қыс мезгілінде кейбір аумақтарды мұз айдынына айналдыру жоспарланған.
Samal Park саябағында әсіресе кішкентай баласы бар ата-аналарға ерекше қолайлы жағдай жасалған. Мұндағы жаяу жүргінші жолдары тегіс әрі кең болғандықтан, балалар арбасымен еркін жүруге болады.
– Паркке күн сайын балаларыммен, немерелеріммен келеміз. Мұнда ең ұнайтыны – серуендеуге арналған жолдардың көптігі. Жаяу жүруге де, арбамен қозғалуға да өте ыңғайлы. Көпірлері бар, бәрі жақсы ойластырылған, – дейді қала тұрғыны.
Серуендеуге, күнделікті қозғалысқа және қала өміріне арналған біртұтас Greenline жаяу жүргіншілер бульварында да құрылыс жұмыстары қызу жүріп жатыр. Жаяу жүргіншілер желекжолының екінші кезеңінің құрылысы Төле би көшесінен Әнет Баба көшесіне дейін және Күлтегін көшесінен Айтматов көшесіне дейін жалғасады. Жоба аясында ірі ағаштар отырғызу арқылы көгалдандыру күшейтіледі, көлеңке мен жайлы микроклимат қалыптасады. Демалыс аймақтары мен қалалық жиһаз орнатылады, бірегей дизайн-код енгізіліп, артық визуалды шу жоқ жинақы әрі тыныш орта болады. Сондай-ақ кешенді көгалдандыру, тоғандар жүйесі, ойын және спорт аймақтарын салу қарастырылған.
Қаладағы көшелер мен даңғылдарды абаттандыру бойынша жергілікті жобалар да жүзеге асырылып жатыр. Мәселен, Кенесары көшесінің ұзындығы 1,25 шақырым болатын аумағы абаттандырылады, ал Қ.Мұңайтпасов атындағы стадион алдын-дағы жаңа аллея демалыс орны бар заманауи қоғамдық кеңістікке айналады. Момышұлы даңғылындағы ұзындығы 1,5 шақырым болатын аумақта жаяу жүргіншілер жолы салынып, көгалдандыру және заманауи абаттандыру жүргізілмек.
Қалада Есіл өзенінің бойында үздіксіз жаяу жүру маршрутын қалыптастыру жалғасуда. Биыл жазда Ақбұлақ каналы арқылы жаңа көпір ашу жоспарланып отыр. Ол триатлон саябағының жағалауын Ататүрік саябағымен байланыстырады.
Жұмыс қаланың ірі жасыл аймақтарында да жалғасады. Президенттік саябақ, Бейбітшілік және келісім паркі (жаңа Конгресс орталығына екінші кезек), «Қалалық романс» саябағы (екінші кезек), сондай-ақ «Кіші Талдыкөл» эко-паркін құру басталады, онда экожүйені сақтауға ерекше назар аударылады.
Абаттандыру жұмысы қаланың барлық ауданында жүргізіліп жатыр. Жобалар орталықты ғана емес, елорданың тұрғын аудандарын қамтиды. Атап айтсақ, Байқоңыр ауданындағы «Тұлпар» сауда үйі жанындағы саябақ, №119 мектептің жанындағы жаңа алаңдар, Пушкин көшесін абаттандыру жұмыстары жалғасуда. Алматы ауданы бойынша Сәтбаев көшесі мен Момышұлы даңғылының қиылысындағы жаңа алаңды, Момышұлы даңғылы мен Құдайбердіұлы көшесін жаңарту қолға алынып отыр. Сарайшық ауданындағы Қошқарбаев даңғылына да абаттандыру жұмыстары жүргізіледі.
Бүгінгі Астана эстетикалық тартымдылық пен экологиялық тұрақтылық үйлесім тапқан сәнді қалаға айналып келеді. Жүйелі абаттандыру жұмысы келер жылы да жалғасын тауып, қаланың рекреациялық әлеуетін толыққанды ашуға және біртұтас экожүйе қалыптастыруға мүмкіндік береді.