Белгілі журналист Гүлбану Әбенова продюсер Баян Алагөзова ұйымдастырған "Алтын ханым" жобасына қатысқан мектеп директоры Ақмоншақ Нұртазаға қатысты өз сыни пікірін білдірді, деп хабарлайды turkystan.kz.
Оның айтуынша, бұл жағдай кәсіби жауапкершілік пен әлеуметтік желідегі танымалдылық арасындағы тепе-теңдік мәселесін қайта көтеріп отыр.
"Өз ісіңді істеу маңызды ма, әлде хайп қуу ма? "Алтын ханым" деген конкурста көптеген лайықты қатысушылар болды – керемет аналар, жарлар, өз ісінің кәсіби мамандары. Бірақ жеңіс, шамасы, әлеуметтік желілерде ең белсенді болған қатысушыға бұйырды.
Қазіргі таңда кейде жеңіске көбірек өзін танытып, жеке брендингін белсенді түрде дамытатын адам жететіндей әсер қалдырады. Мен шығармашыл, креативті адамдарды құрметтеймін, бірақ мен үшін маңыздысы басқа. Балаларым оқитын мектептің директоры күн сайын TikTok немесе басқа әлеуметтік желілерге контент жасаумен айналысқанын қаламас едім.
Педагогтар мен мектеп басшыларының онсыз да жауапкершілігі өте көп – ең бастысы балаларды тәрбиелеу мен білім беру. Сондықтан менің ойымша, әркім өз кәсіби орнында қалуы керек: өз ісін терең әрі жауапкершілікпен атқарып, оны тұрақты өзін-өзі жарнамалау мен пиарға айналдырмауы қажет. Балаларыңыз оқитын мектептің директоры күн сайын TikTok-қа контент жүктегенін қалайсыз ба?" – деп жазды Гүлбану Әбенова.