Еуропада жүргізілген ірі зерттеу жалғыздықтың егде жастағы адамдардың жадына қалай әсер ететінін көрсетті. SHARE зерттеуі аясында 12 елден 65–94 жас аралығындағы 10 мыңнан астам адамның деректері талданған, деп хабарлайды turkystan.kz.
Зерттеу нәтижесі бойынша, өзін жалғыз сезінетін қарттар есте сақтау тесттерін бастапқы кезеңде әлсізірек орындаған. Әсіресе сөздерді бірден және біраз уақыттан кейін қайта жаңғыртуда айырмашылық байқалған. Алайда жеті жылдық бақылау барысында олардың жадының нашарлау жылдамдығы жалғыздықты сезінбейтін адамдармен бірдей болған.
Ғалымдардың айтуынша, бұл күтпеген нәтиже. Ол жалғыздық есте сақтау қабілетінің бастапқы деңгейіне әсер ететінін, бірақ оның кейінгі төмендеу қарқынын жеделдетпейтінін көрсетеді.
Зерттеу 2012–2019 жылдар аралығында жүргізілген. Оған деменциясы бар немесе күнделікті әрекеттері шектеулі адамдар кірмеген. Қатысушылардың жалғыздық деңгейі әлеуметтік байланыс жетіспеуі, назар тапшылығы және оқшаулану сезімі бойынша бағаланған.
Нәтижелерге сәйкес, жалғыздық ең жоғары деңгейде Оңтүстік Еуропа елдерінде тіркелген. Жалғыздықты жиі сезінетін топтың ішінде әйелдер мен жасы үлкен адамдар басым болған, сондай-ақ олардың арасында депрессия мен диабетке шағым жиірек кездескен.
Мамандар жалғыздықты ерте анықтау үшін оны когнитивті тексерулердің бір бөлігіне айналдыруды ұсынады. Бұл қартайған шақта мидың саулығын сақтауға бағытталған тиімді алдын алу шараларын әзірлеуге мүмкіндік береді.