Павлодарда бірнеше банктен несие алып, оны қайтара алмаған әйел сот арқылы банкрот мәртебесіне ие болды. Ол 2019 жылы жалпы сомасы 6,3 миллион теңгеден асатын қарыз рәсімдеген, деп хабарлайды turkystan.kz.
Іс Павлодар облыстық сотының азаматтық істер жөніндегі сот алқасында қаралды. Алғашында әйел несиесін уақытылы төлеп жүргенімен, кейін қаржылық жағдайының нашарлауына байланысты міндеттемелерін орындай алмаған.
Сот деректеріне сәйкес, талапкердің жалпы берешегі 6 344 644 теңгені құраған. Оның тұрақты табыс көзі жоқ әрі екі кәмелетке толмаған баланы асырап отыр.
Соттың баспасөз қызметі берешек көлемі заңда көрсетілген 1600 АЕК-тен асатынын және қарыз міндеттемелері бірнеше кредитор алдында бар екенін атап өтті. Сондай-ақ бұл міндеттемелердің 12 айдан астам уақыт бойы орындалмағаны анықталған.
Алғашқы сот инстанциясы әйелдің өтінішін қанағаттандырудан бас тартқан. Алайда ол бұл шешіммен келіспей, апелляциялық шағым түсірген.
Апелляциялық саты істі қайта қарап, қаржылық басқарушының қорытындысын негізсіз деп таныды. Сот қарыз мөлшерінің дұрыс есептелмегенін және борышкердің әдейі заңсыз әрекет жасағаны дәлелденбегенін атап өтті.
Сонымен қатар, сот әйелдің қаржылық қиындықтары объективті себептермен байланысты екенін ескерді. Жұмыссыздық банкроттық рәсімінен бас тартуға негіз болмайтыны да нақты айтылды.
Нәтижесінде сот алқасы бірінші инстанция шешімін жойып, әйелді банкрот деп тану туралы жаңа шешім қабылдады. Бұл шешім заңды күшіне енді.