Шығыс Қазақстан облысының делегациясы 2-3 сәуірде Қытай Халық Республикасының Шыңжаң-Ұйғыр автономиялық ауданына жұмыс сапарымен барды. Облыс әкімінің орынбасары Бақытжан Байахметов бастаған құрамда бизнес өкілдері, туризм саласының мамандары және өңір әкімдігінің қызметкерлері, жалпы саны 30-ға жуық адам бар. Олар электр энергетикасы, өндіріс және туристік бағдарламаларды дамыту бағытындағы бірлескен жобаларды талқылап, нақты ұсыныстарды қарастырды, деп хабарлайды turkystan.kz.
Сапар аясында Шыңжаң-Ұйғыр автономиялық ауданының орталығы Үрімші қаласында B2B форматындағы кездесулер, өндірістік нысандарға бару және форум шеңберіндегі пікір алмасу ұйымдастырылды. Бұл екі өңір арасында ашық диалог орнатып, ынтымақтастықтың жаңа мүмкіндіктерін айқындауға жол ашпақ.
ШҚО Туризм басқармасының басшысы Ержан Сембинов аймақтың туризм саласындағы әлеуеті зор екеніне тоқталып, арнайы баяндама жасады.
– Облысымызда туристерді орналастыруға арналған 405 нысан бар. Жыл сайын бізге келетін туристер саны артып келеді. Мәселен, өткен жылғы туристер саны 800 мыңнан асқан. Қазір Президент тапсырмасымен Катонқарағай және Зайсан аудандарында әуежайлардың құрылысы жүргізіліп жатыр. Қытайлық әуе компаниялар бұл әуежайларға тікелей рейстер ашады деген үміттеміз, – деді басқарма басшысы.
Шыңжаң-Ұйғыр автономиялық ауданының мәдениет және туризм басқармасы басшысының орынбасары Чжан Лиин өз сөзінде өңірге былтыр 323 млн-нан астам турист келгенін, бұл көрсеткіштің алдыңғы жылмен салыстырғанда 8,03 пайызға артқанын жеткізді.
– Бізде әр санаттағы 18 мың туристік нысан бар. Осындай кездесулер өзара әріптестікті нығайта түсуге жол ашады. Шығыс Қазақстанмен мәдениет және туризм бағыттарында бірлескен жұмысты күшейтуге мүдделіміз, – деді ол.
Ал ШҚО Кәсіпкерлер палатасы жанындағы туризм кеңесінің төрағасы Сымбат Рамазанов өлкенің туристік әлеуетін таныстырып, саланы дамытудың негізгі бағыттары, бірегей табиғи нысандар мен туристерді тарту мүмкіндіктері туралы жан-жақты баяндады.
Өз сөзінде ол Шығыс Қазақстан облысының тамаша табиғаты туризмді дамытуға зор мүмкіндік беретінін атап өтті. Сонымен қатар қазіргі туристік қызметтің жай-күйіне, саланың даму қарқынына тоқталды.
Спикер алдағы кезеңдегі туризмді дамыту перспективаларын айқындап, өңірдің туристік тартымдылығын арттыруға бағытталған нақты жоспарлар мен бастамаларды атап өтті.
Содан соң Шығыс Қазақстан облысы мен Шыңжаң-Ұйғыр автономиялық ауданы арасында өзара түсіністік пен ынтымақтастық туралы меморандумға қол қойылды. Құжат ШҚО-ға инвестиция тарту, туристер ағынын арттыру және туризмді дамытуға бағытталған бірнеше жобаларды қамтиды.
Қол қою рәсіміне қазақстандық делегация атынан Кәсіпкерлер палатасы жанындағы туризм кеңесінің төрағасы С.Рамазанов, «Пасека» шаруа қожалығының басшысы В.Қасымбаев және басқа да өкілдер қатысты.
Іссапар бағдарламасы бұдан әрі Үрімші жылу энергетикалық компаниясында жалғасты. ШҚО әкімінің орынбасары Бақытжан Байахметовке кәсіпорынның техникалық мүмкіндіктері таныстырылды. «Шығыс Жылу» АҚ басшысы Ренат Оразбаевтың айтуынша, Үрімші энергетиктерінің тәжірибесі шығысқазақстандық мамандар үшін пайдалы әрі маңызды.
– Мені қала бойынша тұрғын үйлердің шатырларына орнатылған, пәтер ішіндегі температураны онлайн режимде тұрақты түрде өлшейтін датчиктер таңғалдырды. Барлық ақпарат бірыңғай базаға түседі, ал ауа температурасы белгіленген нормадан ауытқыған жағдайда, колл-орталық мамандары ақауды жою үшін арнайы топ жібереді, – деді «Шығыс Жылу» АҚ бас дирек-торы.
Бұдан кейін екі өңірдің инвестициялық әлеуетінің таныстырылымы өтті. Әуелі ШҚО әкімінің орынбасары Бақытжан Байахметов пен ШҰАА Халық Үкіметі хатшылығы басшысының орынбасары Чжоу Чао өз сөздерімен іс-шараның шымылдығын ашып, ізгі лебіздерімен бөлісті. Ары қарай екі тараптың өкілдері баяндамалар жасап, түрлі салалардағы көрсеткіштерді, алдағы жоспарларды сөз етті.
Іс-шара соңында олар B2B форматында келіссөздер жүргізіп, бірлескен жұмыстың жаңа бағыттарын талқылады.