Алматыда Наурыз мерекесі қарсаңында бұрын-соңды болмаған ауқымды музыкалық флешмоб ұйымдастырылды. Almaty Arena мұз сарайында ұйымдастырылған «Домбыра үні» атты флешмобта бір мезетте 11 500 оқушы домбыра тартып, Қазақстан рекордын жаңартты.
Дайындығы бірнеше айға жалғасқан бұл іс-шараға жалпы саны 200-ден астам мектеп пен қосымша білім беру ұйымдарында біріккен домбыра ансамбльдері қатысты. Оларды 1 000-нан астам педагог дайындады. Флешмобқа 7-10 сынып оқушылары қатысты.
Іс-шара барысында тек бір күй ғана емес, арнайы әзірленген музыкалық попурри де орындалды. Бағдарламаға Төлеген Мұхамеджанов пен Алтынбек Қоразбаевтың шығармалары, сонымен қатар Нұрғиса Тілендиевтің күйлері, сондай-ақ Құрманғазының «Балбырауын» күйі заманауи өңдеуде енгізілді. Қойылым мазмұны заманауи технологиялармен толықтырылып, жасанды интеллект негізінде арнайы бейнемазмұн әзірленді.
Қазақстан рекордтар кітабының сарапшылары флешмоб нәтижесін ресми түрде тіркеп, қатысушылар саны, орындау үйлесімі мен ұзақтығын тексерді. Нәтижесінде, бұл көрсеткіш «Жаппай жетістіктер» санаты бойынша жаңа ұлттық рекорд ретінде танылды.
Осылайша, бұл бастама ұлттық өнерді дәріптеп қана қоймай, жас буынның мәдени құндылықтарға деген қызығушылығын арттырған тағылымды жобаға айналды.
Темірлан ШОТАНОВ,
Алматы қаласы Білім басқармасының қызметкері:
Ұлттық өнермен сусындаған ұрпақ
– Бұл идеяның негізі ұлттық құндылықтарымызды заманауи форматта дәріптеуден бастау алды. Алматы – мәдениет пен білімнің ордасы, сондықтан біз оқушылардың бүгінде домбыра үйірмелеріне көптеп баратынын көрсеткіміз келді. Ұлттық аспапта ойнау тек өнер емес, бұл – ұрпақтар сабақтастығы. Наурыз мейрамы қарсаңында мыңдаған баланың басын қосып, қазақтың күйін асқақтату арқылы еліміздің рухын көтеруді мақсат еткен болатынбыз.
Бұл іс-шараны ұйымдастырудағы ең үлкен қиындық – 200-ден астам мектептен 11 мың баланы бір уақытта Almaty Arena-ға жеткізу болды. Олардың қауіпсіздігін қамтамасыз ету үлкен дайындықты талап етті. Сонымен қатар оларды тасымалдайтын автобустарды әзірлеу де оңай шаруа емес. Музыка пәнінің мұғалімдері бәрін ойдағыдай өткізу үшін бір ай бойы тынымсыз еңбек етті. Мұны қалалық білім беру жүйесінің үйлесімді жұмысының нәтижесі деп білеміз.
Мұндағы басты мақсат – өскелең ұрпақтың бойында ұлттық бірегейлікті қалыптастыру және домбыра өнерін насихаттау. Біз балалардың тек гаджеттерге телмірмей, өз халқының мәдени мұрасына мақтанышпен қарағанын қаладық. Бұл іс-шара – Қазақстанның рекордтар кітабына ену ғана емес, бұл – балалардың жүрегіне отансүйгіштік нәрін егу.
Алдағы уақытта басқа форматтағы бастамаларды іске асырсақ деген ойымыз бар. Сондықтан осындай ауқымды іс-шараларды дәстүрге айналдыруды көздеп отырмыз. Мұндай іс-шаралар жастарды бірлікке, ұйымшылдыққа және тәртіпке тәрбиелейді. 11 мың бала бір сахнада тұрғанда өздерін бір тұтас күштің бөлшегі ретінде сезінетіні хақ. Осылайша, ұлттық өнермен сусындаған бала өз елінің патриоты болып қалыптасады.