Нарциссизм деңгейі жоғары адамдардың жасырын агрессияға жиі баруының басты себебі – әлеуметтен шеттетілу сезімі. Мұндай қорытынды Journal of Psychology журналында жарияланған жаңа зерттеуде айтылды, деп хабарлайды turkystan.kz.
Зерттеуді Даниэль Уальдек жетекшілік еткен Ковентри университеті ғалымдары жүргізген. Олар адамдар өзін еленбеген немесе топтан тыс қалғандай сезінгенде, әсіресе нарциссизм белгілері бар тұлғаларда пассив-агрессив мінез-құлық күшейетінін анықтаған.
Психологтардың түсіндіруінше, нарциссизм – бұл тек өзіне сенімділік емес, сонымен қатар мойындалуға деген жоғары қажеттілік пен нәзік өзін-өзі бағалау. Сондықтан мұндай адамдар үшін еленбеу жеке тұлғасына тікелей қауіп ретінде қабылданады.
Зерттеу нәтижесі көрсеткендей, мұндай жағдайда олар ашық жанжалдан гөрі жанама әрекеттерді таңдайды. Атап айтқанда:
– айналасындағыларға жасырын түрде кедергі жасау;
– әңгіме барысында әдейі ыңғайсыз жағдай тудыру;
– өзгелерді жанама сынау.
Ғалымдар бұл мінез-құлықты «жасырын агрессия» деп атайды. Оның ерекшелігі – сырт көзге анық байқалмайды, бірақ қарым-қатынасты біртіндеп ушықтырады.
Сонымен қатар зерттеушілер теріс циклдің бар екенін атап өтеді: адам өзін шеттетілгендей сезінеді, сосын пассив-агрессив әрекет жасайды, содан соң соның салдарынан айналасындағылар одан алыстайды, бұл сезім одан әрі күшейе түседі.
Мамандардың пікірінше, мұндай жағдайлардың алдын алу үшін ұжымда ашық әрі қолдаушы орта қалыптастыру, ал жеке деңгейде эмоцияларды басқару дағдыларын дамыту маңызды.