Микротолқынды пеш «тағамдағы витаминдерді жояды» немесе «денсаулыққа зиян» деп жатады. Алайда заманауи ғылыми зерттеулер бұл түсініктің көбіне қате екенін көрсетеді. Негізгі мәселе сәулеленуде емес, тағамды қыздыру процесінде жатыр, деп хабарлайды turkystan.kz health.mail.ru-ға сілтеме жасап.
Микротолқындар иондаушы емес сәулеленуге жатады. Яғни олар химиялық байланыстарды тікелей бұзбайды және тағамды «радиоактивті» немесе уытты етпейді. Микротолқындардың әсері судың молекулаларын қоздырып, олардың жылдам қозғалуына әкеледі. Соның нәтижесінде тағам тез қызады. Демек, витаминдерге әсер ететін фактор сәуле емес, жылу.
Ғылыми зерттеулер әртүрлі пісіру тәсілдерін салыстырғанда қызық нәтиже көрсеткен. Мысалы, С дәрумені мен В тобы витаминдерінің мөлшерін талдаған зерттеулерде микротолқынды пеште дайындалған тағамда бұл витаминдер көбіне қайнатылған тағамға қарағанда көбірек сақталған. Көкөністерді микротолқында өңдеген кезде С дәрумені жақсырақ сақталады, ал қайнатқанда оның едәуір бөлігі суға өтіп кетеді.
Ұқсас нәтиже ет өнімдерінде де байқалған. Микротолқында пісірілген етте В тобының жылуға сезімтал витаминдері, мысалы тиамин мен В6 дәстүрлі қуыру немесе пеште ұзақ пісіруге қарағанда көбірек сақталады. Мұның себебі – пісіру уақытының қысқа болуы және судың аз қолданылуы.
Дегенмен бір нәрсені түсіну маңызды: кез келген жылумен өңдеу кезінде кейбір витаминдер азаяды. Әсіресе С дәрумені мен фолий қышқылы жоғары температураға сезімтал. Температура неғұрлым жоғары әрі өңдеу уақыты ұзақ болса, витаминдердің жоғалуы да соғұрлым көп болады.
Сондықтан витаминдердің азаюына микротолқынның өзі емес, жылудың әсері себеп болады. Ал тағамды қысқа уақытта қыздыратындықтан, микротолқынды пеш кей жағдайда пайдалы заттардың көбірек сақталуына да мүмкіндік береді.