Қазақстан Республикасы Қорғаныс ведомствосының басшысы, авиация генерал-лейтенанты Дәурен Қосанов пен Парламент депутаттары Алматы гарнизонына жұмыс сапары барысында 78 460 әскери бөлімінің базасында іске қосылған Sarbaz+ инновациялық жобасының жұмысымен танысты. Жоба мерзімді әскери қызметті жаңғыртуға, армияның беделін арттыруға және сұранысқа ие мамандарды даярлауға бағытталған.
Сапар барысында қонақтарға әскери бөлімде енгізілген заманауи технологиялар мен оқу мүмкіндіктері көрсетілді. Атап айтқанда, бейнеаналитика жүйесі, Rtel радиобайланыс мамандарын даярлау сыныптары, ұшқышсыз басқарылатын Ashik Aspan құрылғылары операторларын оқыту орталығы және Eltex технологиялық жүйелері бойынша жабдықталған кабинеттер таныстырылды. Бұл бағыттар қазіргі заманғы әскери қызметтің цифрлық трансформациясына сай келетін мамандарды қалыптастыруды көздейді.
Сонымен қатар мерзімді қызметтегі сарбаздар әртүрлі білім беру бағдарламалары мен кәсіби курстарға қатысу мүмкіндігіне ие. Astana Hub технопаркімен бірлескен TechOrda бағдарламасы аясында сарбаздар ақпараттық қауіпсіздік талда-уын, деректерді қорғауды және ұшқышсыз ұшу аппараттарын басқаруға арналған жасанды интеллект технологияларын меңгереді. Бұдан бөлек, QLANG онлайн-платформасы арқылы ағылшын тілі курстары ұйымдастырылған.
Жоба инфрақұрылымын дамыту да басты назарда. Қонақтарға Workout спорт алаңы, стритбол аймақтары, заманауи тренажер залы, қоян-қолтық ұрыс клубы және электронды тир көрсетілді. Сондай-ақ цифрлық сервистер – Ай-сұлу телеграм-боты мен ARMIA.KZ ақпараттық платформасының мүмкіндіктері таныстырылды. Бұл сервистер әскери қызметшілердің күнделікті өмірін жеңілдетуге және кері байланысты жеделдетуге ба-
ғытталған.
– Sarbaz+ технологияны, инфрақұрылымды дамытып, адам күшін саналы жұмсауға бағытталған. Біз қызметтің заман талабына сай болуын және әскери қызметшілердің кәсіби өсуіне мүмкіндік жасауды көздейміз, – деді Дәурен Қосанов.
Жобаны Парламент Сенатының де-путаты Ғалиасқар Сарыбаев жоғары баға-лады. Оның айтуынша, Sarbaz+ армияны модернизациялауға жүйелі көзқарастың нақты көрінісі әрі адами капиталды дамытудың стратегиялық міндеттеріне жауап береді.
– Бүгін мерзімді қызмет тек тәртіп пен патриотизм мектебі ғана емес, заманауи құзыреттерді игеретін алаңға айналғанын көріп отырмыз. Sarbaz+ жобасы бәсекеге қабілетті мамандарды қалыптастырып, жастардың Қарулы Күштерге сенімін арттырады, – деді сенатор.
Sarbaz+ жобасы жастар мен қоғам үшін тартымды, заманауи армия бейнесін қалыптастыруды мақсат етеді. Оның аясында мерзімді қызметтегі сарбаздарды оқыту мен тәрбиелеудің жаңа әдістері енгізілуде. Жобаға қатысқан әскери қызметшілер запасқа шыққаннан кейін еңбек нарығында сұранысқа ие дағдыларды меңгеріп, жұмысқа орналасу мүмкіндігін арттыра алады.
Ұйымдастырушылардың пікірінше, жоба сәтті жүзеге асқан жағдайда, бұл бастама Қарулы Күштердің барлық әскери бөлімдерінде кеңінен енгізіліп, армияның жаңа сапалы даму кезеңіне жол ашады.
Бұдан кейін Қорғаныс министрінің Тәрбие және идеологиялық жұмыс жө-ніндегі орынбасары, генерал-майор Асқар Мұстабековтың басшылығымен «Жаңа форматтағы әскер. Әскери-патриоттық тәрбие» тақырыбында дөңгелек үстел отырысы ұйымдастырылды. Іс-шара Бауыржан Момышұлы атындағы әскери-спорт колледжі базасында өтті.
Жиынға Парламент депутаттары, мемлекеттік органдардың, үкіметтік емес сектордың өкілдері мен медиасарапшылар қатысты. Кездесу барысында әскери-патриоттық тәрбиені жетілдіру, әскери қызметтің беделін арттыру және Қарулы Күштердің оң имиджін қалыптастыру мәселелері талқыланды.
Генерал-майор Асқар Мұстабеков өз сөзінде әскерде жастардың жан-жақты дамуына жағдай жасалып жатқанын атап өтті.
– Біз цифрландыруды жүйелі түрде дамытып, әскер мектебінен өткен азаматтарға білім беру және әлеуметтік мүмкіндіктерін кеңейтеміз. Стратегиялық мақсатымыз – жоғары технологиялық армия құру, адами әлеуетті нығайту, әскери қызметшілердің әлеуметтік қорғалуын қамтамасыз ету және олардың жауынгерлік рухын арттыру, – деді ол.
Парламент Сенатының депутаты, Халықаралық қатынастар, қорғаныс және қауіпсіздік комитетінің мүшесі Ғалиасқар Сарыбаев әскери-патриоттық тәрбие мәселесіне қатысты өз ұстанымын білдірді. Оның айтуынша, патриоттық тәрбиені тек армиямен байланыстыру дұрыс емес.
– Біз мектеп жасынан бастап ант беру сәтіне дейінгі аралықта қалыптасатын тәрбиені жүйелі түрде қарастыруымыз керек. Патриотизм – үздіксіз қалыптасатын құндылық, – деп атап өтті сенатор.
Алматы қаласы, Алматы және Жетісу облыстары бойынша «Аналар жүрегі» сарбаз аналары комитетінің өкілі Татьяна Тропина патриоттық тәрбие ең алдымен қоғамнан және отбасынан басталуға тиіс екенін жеткізді.
– Әскери-патриоттық тәрбие идеясын қолдаймыз. Алайда сенім адам қауіпсіздігінен, отбасын құрметтеуден, әділ іріктеуден және қызметтің мәнін түсінуден басталады. Қоғам бұл бағытта сөзбен емес, іспен әрекет еткенде ғана патриотизм жастар саналы түрде қабылдайтын жауапкершілікке айналады, – деді қоғам өкілі.
Дөңгелек үстелге қатысушылар әскери-патриоттық тәрбие беру, әскери қызметтің беделін арттыру және Қарулы Күштердің имиджін нығайту жұмыстары жүйелі негізде құрылып, барлық жас санаттары мен әлеуметтік топтарды қамтуы тиіс деген ортақ пікірге келді.
Наурызбек Сарша