Күнделікті асүйде қолданылатын кейбір дәмдеуіштер көңіл күйге әсер етіп, депрессия белгілерін азайтуы мүмкін. Мұндай тұжырымды қытайлық ғалымдар эксперименттік және клиникалық зерттеулерді талдау барысында жасаған. Ғылыми шолу Frontiers in Nutrition журналында жарияланды, деп хабарлайды turkystan.kz.
Зерттеу авторларының мәліметінше, куркума, шафран, зімбір, қара бұрыш және чили бұрышы құрамында нейропротекторлық қасиеті бар өсімдік текті белсенді қосылыстар кездеседі. Бұл заттар депрессияға байланысты негізгі биологиялық тетіктерге ықпал ете алады: мидағы қабынуды және тотығу стрессін азайтады, нейромедиаторлар алмасуын реттейді және «ішек - ми» осіне әсер етеді. Сонымен қатар олар мидың бейімделу қабілетін, яғни нейропластиканы қолдауға көмектесуі мүмкін.
Классикалық антидепрессанттардан айырмашылығы, дәмдеуіштер әдетте тағам құрамында аз мөлшерде тұтынылады. Бұл олардың ағзаға біртіндеп әрі кешенді әсер етуіне мүмкіндік береді және қауіпсіздік тұрғысынан қолайлы болуы ықтимал. Дегенмен ғалымдар белсенді заттардың ағзаға сіңуі мен нақты емдік дозаларын анықтау үшін қосымша зерттеулер қажет екенін атап өтті.
Мамандардың пікірінше, тамақтану мен өсімдік компоненттерінің эмоционалдық жағдайды реттеудегі рөлін тереңірек түсіну депрессияның алдын алу және оны қосымша емдеу тәсілдерін кеңейтуі мүмкін.