Жапонияда еңбек мәдениетіне өзгеше көзқарас ұсынған жаңа форматтағы бар жұрт назарын аударып отыр. Бұл мекеме арнайы жұмыстан шығуды немесе мансабын өзгертуді ойлап жүрген адамдарға арналған, деп хабарлайды turkystan.kz.
Барда ішімдіктер тегін беріледі, ал басты мақсат табыс табу емес, әңгіме айту. Келушілер күйзеліс, шаршау, кәсіби дағдарыс пен күмәндері туралы еркін сөйлей алады. Бар қызметкерлері ешкімді айыптамайды, қысым көрсетпейді, тек тыңдайды.
Бұл бастама Жапонияда ұзақ жұмыс уақыты, қатаң иерархия және жоғары талаптардан туындайтын психологиялық жүктеме мәселелері жиі талқылана бастаған кезеңге тұспа-тұс келді. Елде жұмысқа наразылық немесе жұмыстан кету туралы ашық айту бұрыннан ұят саналатын, сондықтан мұндай кеңістіктің пайда болуы – сирек құбылыс.
Ұйымдастырушылардың айтуынша, тегін формат пен қолдаушы орта адамдарға өз жағдайын сабырмен ой елегінен өткізуге, жұмыстан шын мәнінде не күтетінін түсінуге көмектеседі. Тіпті бұл жаңа бастауға әкелсе де, бастысы – мансаптағы қанағатсыздық туралы әңгімені қалыпты құбылысқа айналдыру.