Президенттің Жапонияға сапары аясында сомасы 3,7 миллиард доллардан асатын 60-тан астам екіжақты құжатқа қол қойылды, деп хабарлайды turkystan.kz.
Мемлекет басшысы бұл туралы Токиода өтіп жатқан «Орталық Азия-Жапония» саммитінде мәлімдеді.
«Сауда-экономикалық және инвестициялық байланысты жандандыруға баса мән беру қажет.
Былтыр өзара сауданың көлемі шамамен 2 миллиард долларға жетті.
Қазақстан Жапония нарығына уран, сирек кездесетін металдар және мұнай жеткізеді.
Жапония – Қазақстан экономикасының негізгі инвесторларының бірі. Оның елімізге құйған қаржы көлемі 8,5 миллиард доллардан асты.
Қазақстан ұзақ уақыттан бері ірі жапон корпорацияларымен табысты қарым-қатынас орнатты. Біз елімізде еңбек етіп жатқан Жапонияның шағын және орта компанияларының қызметіне қолдау көрсетіп келеміз.
«Орталық Азия – Жапония» форматындағы бизнес форумында екіжақты байланыстарды жандандырып, жаңа инвестициялық жобаларды іске асыруда қажетті уағдаластықтарға қол жеткізетінімізге сенімдімін.
Жапонияға сапарымның аясында 60-тан астам екіжақты құжатқа қол қойылды. Оның ішінде сомасы 3,7 миллиард доллардан асатын коммерциялық келісімдер де бар», – деді Президент.