Ұлыбританияда 106 жасқа толған Джоан Кларк ұзақ өмір сүрудің құпиясын күрделі диеталардан немесе генетикалық артықшылықтардан емес, қарапайым өмірлік ұстанымдардан іздейді. Уокинг қаласындағы қарттар үйінің тұрғыны өзінің туған күнінде екі ғана ережені атады: барға қанағат ету және адамдарға мейірімді болу, деп хабарлайды turkystan.kz.
1919 жылы Шеффилдте дүниеге келген Кларк бір ғасырдан астам уақытта адамзат бастан өткерген ең ірі оқиғалардың куәсі болды – Екінші дүниежүзілік соғыс, Айға қону, технологиялық серпілістер мен пандемиялар. Соғыс жылдары қару-жарақ зауытында жұмыс істеп, кейін сауда мен кеңсе қызметінде еңбек еткен.
Оның айтуынша, ұзақ өмірдің негізі – үнемі жетпейтін нәрсеге емес, қолда барға назар аудару. Бұл – заманауи зерттеулер де жиі айтып жүрген тұжырым: психологиялық тұрақтылық пен әлеуметтік байланыстар денсаулыққа тікелей әсер етеді.
106 жасында Кларк әлі де белсенді, кітап оқиды, музыка тыңдайды, қолөнермен айналысады және гүл композицияларын жасайды. Болашаққа үлкен жоспар құрмаса да, күнделікті өмірден ләззат алуды тоқтатпаған. Ұзақ өмірдің ең сенімді инвестициясы, бәлкім, дәл осы болар.