Павлодар облысында полицейлер заңсыз аңшылық фактісін анықтады, деп хабарлайды turkystan.kz.
Полиция қызметкерлері рейдтік іс-шаралар барысында Май ауданының Қызыл Еңбек ауылынан 3 км қашықтықтағы дала аймағында Toyota Land Cruiser 200 автокөлігін тоқтатты.
Көлікті қарап-тексеру кезінде арқардың және бір киіктің еті табылып, тәркіленді. Сонымен қатар, автокөлік салонынан тегіс ұңғылы бір оқпанды карабин алынды.
Сондай-ақ полицейлер Subaru Outback автокөлігін тексеру барысында көліктің салонынан чемодандарда 500-ден астам әртүрлі калибрлі оқ-дәрілер, нарезді бір оқпанды карабиндер және тегіс ұңғылы екі оқпанды мылтық табылып, тәркіленді.
– Заңсыз аңшылық фактісі бойынша сотқа дейінгі тергеу жүргізілуде. Тәркіленген еттер сараптамаға жіберілді. Оқиғаның мән-жайы мен себептері тергеу барысында анықталатын болады, – деді Павлодар облыстық ПД өкілдері.