Гонконгтың арнайы әкімшілік ауданында орналасқан Wang Fuk Court тұрғын үй кешенінде шыққан ірі өрт салдарынан қаза тапқандар саны 146 адамға жетті. Бұл туралы қала полициясы хабарлады.
Ведомствоның мәліметінше, жергілікті уақытпен 16:00-де (Астана уақытымен 13:00) тіркелген өрт 26 қараша күні тұрғын үй кешеніндегі бірнеше биік ғимаратты түгел шарпыған.
South China Morning Post басылымы өрттің кешенді жаңарту жұмыстары барысында қойылған бамбук қалқандарынан басталғанын жазады. Жалын алдымен бірінші корпустан өршіп, кейін тағы үш ғимаратқа тараған. Бұл оқиға Гонконгтағы соңғы 17 жылдың ішіндегі ең жойқын өрт ретінде тіркелді.