Түркістан облысының Мақтаарал ауданында полицейлер ер адамды атып өлтірді, деп хабарлайды turkystan.kz.
Полицияға жергілікті келіншек хабарласып, бұрынғы күйеуінің қарумен келіп, кәмелетке толмаған балаларының көзінше жанжал шығарғаны туралы хабарлаған.
Оқиға орнына келген полицейлер ер адамды ұстауға әрекет жасаған, алайда ол үйден жүгіріп шығып, көршінің ауласындағы қораға тығылған. Қауіпсіздік мақсатында аумақ қоршауға алынған.
Құқық қорғау қызметкерлерінің заңды талаптарына бағынбай, ер адам оқ жаудырған. Полицейлер алдымен ауаға ескерту оқ атқан, бірақ ол реакция жасамаған. Нәтижесінде тәртіп сақшылары қызметтік қару қолдануға мәжбүр болды. Ер адам алған оқ жарақатынан оқиға орнында көз жұмды.
«Қазір болған оқиғаның барлық мән-жайын анықтау мақсатында қажетті тергеу және жедел шаралар жүргізіліп жатыр. Тергеу барысы полиция департаменті басшылығының бақылауында», — деп хабарлады ведомство.
Оқиға орнын қарау кезінде тіркелмеген шолақ мылтық, оқ-дәрілер және гильзалар тәркіленді. Оқиға фактісі бойынша қылмыстық іс қозғалды.