Күні кеше Мемлекет басшысы Қасым-Жомарт Тоқаев мемлекеттік сапармен Ресей Федерациясына барды. Екі ел Президенттері екіжақты серіктестік мәселелерін талқылап, 13 құжатқа қол қойды. Мәжіліс депутаты Наталья Дементьеваның айтуынша бұл сапар екі ел арасындағы стратегиялық серіктестіктің жаңа кезеңге өткенін көрсетіп отыр.
«Президент Қасым-Жомарт Тоқаевтың Ресей Федерациясына жасаған мемлекеттік сапары екі ел арасындағы стратегиялық серіктестіктің жаңа, мазмұнды кезеңге өткенін айқын көрсетті. Келіссөздер нәтижесінде энергетика, газ инфрақұрылымы, өнеркәсіптік кооперация, көлік-логистика, ауыл шаруашылығы және гуманитарлық бағыттар бойынша нақты келісімдер пакеті мақұлданды. Энергетика саласында тараптар магистральдық газ құбырларын дамыту, Қазақстанға газ жеткізу көлемдерін ұлғайту және газ өңдеу қуаттарын бірлесіп пайдалану жөнінде уағдаластыққа қол жеткізді. Өнеркәсіптік кооперация аясында бірлескен машина жасау кәсіпорындарын кеңейту, металлургия және химия өндірісі бойынша жаңа жобаларды іске қосу, сондай-ақ өндірістік технологиялар трансферін жеделдету туралы келісімдер жасалды», – дейді ол.
Депутаттың айтуынша, бұл сапарда еліміз үшін маңызды мәселелер талқыға салынды.
«Көлік және транзит бағытында теміржол және автомобиль дәліздерінің өткізу қабілетін арттыру, “Солтүстік – Оңтүстік” және “Батыс Еуропа – Батыс Қытай” бағыттары бойынша бірлескен шараларды үйлестіру, кедендік рәсімдерді цифрландыру нәтижесінде жүк айналымын тұрақтандыруға басымдық берілді. Ауыл шаруашылығында агротехникалық стартаптар, терең қайта өңдеу, тұқым шаруашылығы, ветеринарлық бақылаудың өзара танылуы, азық-түлік қауіпсіздігі бойынша нақты техникалық келісімдер бекітілді. Гуманитарлық салада жоғары оқу орындарының филиалдарын кеңейту, ғылыми-зерттеу жобаларын бірлесе жүргізу, студенттік және академиялық алмасу бағдарламаларын көбейту бойынша нақты жоспарлар қабылданды. Бұл шешімдер екі елдің ғылыми-білім беру кеңістігін ұзақ мерзімді нығайтады. Жалпы алғанда, сапар нәтижелері Қазақстан мен Ресей арасындағы ынтымақтастықтың прагматикалық, нақты нәтижеге бағытталған жаңа деңгейге көтерілгенін көрсетті. Қабылданған келісімдер екі елдің экономикалық қауіпсіздігіне, өнеркәсіптік дамуына және аймақтық тұрақтылығына тікелей әсер етеді», – дейді ол.