Ғалымдар ұялшақтықтың физиологиялық негізін анықтады. Personality and Individual Differences журналында жарияланған зерттеу нәтижесіне сәйкес, адамның ұялшақ болуына мидың мишығындағы (cerebellum) өзіндік белсенділік деңгейі әсер етеді, деп хабарлайды turkystan.kz.
Зерттеу Қытайдың Оңтүстік Қытай педагогикалық университетінің ғалымы профессор Хонг Лидің жетекшілігімен жүргізілген. Бұған дейін ұялшақтық көбіне алдыңғы маңдай қыртысы (prefrontal cortex) және амигдала аймақтарымен байланыстырылған болатын, алайда жаңа зерттеу бұл түсінікті кеңейтті.
МРТ зерттеуіне қатысқан 42 студенттің ми белсенділігі мен мінез-құлық сипаттары салыстырылды. Нәтижесінде, ұялшақ адамдарда мишықтың оң артқы бөлігі әлсіз белсенділік көрсеткені анықталды. Яғни, ми тыныш күйде болған кезде осы аймақтың нейрондық синхрондылығы төмендейді.
Зерттеушілер ұялшақтықтың мидағы «қорғаныс жүйесімен» тығыз байланысты екенін айтады. Бұл жүйе мінез-құлықтық тежеу жүйесімен (Behavioral Inhibition System, BIS) байланысады, ол әлеуметтiк қауіптер мен жазалаудан қорғану реакцияларын басқарады.
«Біздің нәтижелер көрсеткендей, ұялшақ адамдар әлеуметтiк жағдайларды қауіпті деп қабылдайды. Бұл олардың мишық белсенділігін және мінез-құлықтық тежеу жүйесін қатар күшейтеді», дейді профессор Ли.
Зерттеу ұялшақтықты әлсіздік немесе мінездік кемшілік емес, мидағы қауіп пен байланыс арасындағы теңгерімнің ерекшелігі ретінде қарастыруға мүмкіндік береді.
Ғалымдар енді бұл құбылысты кеңірек зерттеуді түрлі жастағы және мәдени ортадағы адамдармен жүргізуді жоспарлап отыр.