Тараз қаласының мамандандырылған әкімшілік соты отбасылық-тұрмыстық жанжал шығарған ер адамға қатысты істі қарады, деп хабарлайды turkystan.kz.
Анықталғандай, түнгі сағат 03:20 шамасында азамат У. үйінде отбасының тыныштығын бұзып, жұбайын балағаттаған. Бұған дейін де ол осындай әрекеті үшін жауапқа тартылған.
Сотта ер адам кінәсін мойындап, өкініш білдіріп, жұбайынан кешірім сұрады. Жәбірленуші оны қамауға алудың орнына қоғамдық жұмысқа тартуды сұрады.
Нәтижесінде сот азамат У.-ды кінәлі деп танып, оған 40 сағат қоғамдық жұмыс жазасын тағайындады.
Сонымен бірге, ол үш ай бойы аптасына бір рет учаскелік полицияда профилактикалық әңгімеден өтіп тұруы тиіс.