Алғадағы ауқымды істер

Ақтөбе облысының әкімі Асхат Шахаров өткен аптада Алға ауданына арнайы жұмыс сапарымен барып, мұндағы өзекті мәселелердің шешілуіне назар аударды. Қазір ауданда жол, көпір, әлеуметтік нысандарды жөндеу және ауызсу – ең өзекті мәселелердің қатарында. 

Балаларға қолайлы 
жағдай жасалады

Жұмыс сапарын Бестамақ ауылынан бастаған Асхат Ша­харов биыл күрделі жөндеуден өткен «Болашақ» бала­бақ­шасын аралады. Бұл нысанның былтыр жобалық-сме­талық құжаттары әзірленген, биыл облыстық бюд­жеттен қаржы бөлінді. 
2023 жылы Алға ауданына жұмыс сапары барысында Асхат Шахаров балабақша ғимаратын жөндеуге жо­ба­лық-сметалық құжаттама дайындауды тапсырған еді. Мі­­не, сол кездегі өңір басшысының тапсырмасы биыл то­­­­­лықтай орындалып отыр. 
Аталған балабақшаның меңгерушісі Ләззат Құрма­нова ғимараттың шатыры толықтай ауыстырылып, электр сымдары жаңартылғанын жеткізді. Сондай-ақ су­мен жабдықтау, кәріз және жылыту жүйелеріне күрделі жөн­­деу жүргізіліп, ішкі құбырлары ауыстырылған. Сон­дай-ақ әрлеу жұмыстары жасалып, ғимараттың қасбеті де қапталды. Бұдан бөлек, балабақша алдына балалар ойын алаңы орнатылды.
Жөндеу жұмыстарын «Бабэк-Құрылыс» ЖШС бес ай ішін­де аяқтады. Қазір балабақша балаларды қабылдауға дайын.
Облыс әкімі өсіп келе жатқан ұрпақты тәрбиелеу үшін қауіпсіз әрі жайлы орта қалыптастырудың маңыз­ды­лығын атап өтіп: «Біздің басты мақсатымыз – ба­ла­лар­дың сапалы білім мен тәрбие алуына қолайлы әрі қауіп­сіз жағдай жасау. Балабақша әр бала өзін қор­ғалғандай сезінетін жайлы да заманауи мекен болуы керек, – деді.

Жол жөндеу жұмыстары 
аяқталуға жақын

Асхат Шахаров ауданға жұмыс сапары аясында Тоқ­мансай ауылдық округіне барып, мұндағы «Алға-Тоқ­ман­сай» аудандық автожолының жөндеу барысымен және әлеуметтік нысандардың жағдайымен танысты.
Қазір ұзындығы 26,6 шақырым болатын екі учаскеде орташа жөндеу жұмыстары жүргізілуде. Жұ­мыстарды «АссанаДорСтрой» ЖШС атқаруда. Жоба ал­ғаш рет 2017 жылы басталғанымен, іске асыру ба­ры­сын­да бірнеше рет түзетулер енгізіліп, мердігерлермен сот даулары да болған. 2024 жылы облыс әкімі Асхат Ша­харовтың тапсырмасымен жобаға өзгерістер енгізіліп, қар­жыландыру қайта қаралды.
Жөндеу жұмыстарын мердігер биылғы қазан айының соңы­на дейін толық аяқтауды жоспарлап отыр.
– Бұл жолдың жөндеу жұмыстары бірнеше жылға созы­лып кетті. Әрине, ол тұрғындардың орынды сын-ес­кертпелеріне де себеп болды. Ендігі маңызды мәселе – жұ­мыстың мерзімінде әрі сапалы орындалуы. Бұл жол тұрғындардың күнделікті өмірі мен бүкіл округтің дамуы үшін үлкен маңызға ие. Нысан толық аяқталғанға дейін жағ­дайды жіті бақылауда ұстаймыз, – деді Асхат Ша­харов.

Тоқмансайдың мектебіне 
жөндеу қажет 

Ақтөбе облысының әкімі Тоқмансай ауылындағы негізгі мектепке барып, ұжыммен кездесті.
Мектеп директоры Гүлмира Нұрмағанбетова өңір бас­шысын оқу орнының тыныс-тіршілігімен таныс­тыр­ды. 
Қазір мектеп ғимаратына күрделі жөндеу қа­жет. 2004 жылы ашылғаннан бері оқу орнының ғи­маратына ағымдағы жөндеу жұмыстары ғана жүргізілген. Мек­тепте 5 оқу кабинеті, информатика кабинеті, кітап­ха­на, асхана және бейімделген спорт залы бар. Қазір мұн­да 67 оқушы білім алуда. Мектептегі басты мәселе — оқу кабинеттеріне оқушылардың сыймауы. Бұған дейін болған директор кабинеті мен мұғалімдер бөлмесін оқу сыныптарына берген. Сондай-ақ спорт залы да жоқ. Ғима­раттың тозуы және заманауи талаптарға сай еместігі оқу корпусын күрделі жөндеуден өткізуді немесе жаңа ғи­марат салуды қажет етеді.
Тоқмансайлықтар облыс әкіміне балалардың жайлы жағ­дайда оқуы үшін ауылда жаңа мектеп тұрғызуды сұра­ды. Асхат Шахаров жауапты тұлғаларға ауылда жаңа мек­теп салу мәселесін қарауды тапсырды.
– Мектеп – ауыл өмірінің орталығы. Балалар қауіпсіз ж­әне жайлы жағдайда оқуы керек. Тоқмансайда жаңа мек­теп салу мүмкіндігін қарастырамыз. Ауыл мектептерін қол­дау – біздің маңызды басымдықтарымыздың бірі, – деді облыс әкімі.

Ауызсу мәселесі шешіледі

Қазіргі таңда Алға қаласында ауызсу жүйесін жақ­сарту бағытында бірқатар жұмыстар жүргізілуде. Бұл мә­­­селе халық санының артуы мен қаланың кеңеюіне бай­ланысты өзекті болып отыр. Бүгінде Алғада шамамен 23 мың тұрғын бар. Жаз мезгілінде, әсіресе көпқабатты үй­лерде су тапшылығы мәселесі жиі кездеседі. Жеке сек­тордағы тұрғындар бау-бақша суаруға суды көп пай­да­ланатындықтан, су құбырына жүктеме арта түседі.
Ауызсумен қамту саласындағы маңызды жобалардың бірі – Тамды су қоймасы маңындағы 35 кВ жоғары электр же­лісін қайта жаңғырту және жаңа су қоймаларын салу. Жо­ба аясында әрқайсысы 1400 текше метр төрт резер­вуар салынды, 10,9 шақырымнан астам электр желісі тар­тылды. Құрылыс-монтаж жұмыстары ұлттық қор есе­бінен қаржыландырылған, оның жалпы құны — 921 миллион теңге. Қазір резервуарларға су тарту же­лісі салынып жатыр. Мердігер ұйым – «А.Т.Е-ЖОЛ» ЖШС. Бұл бағыттағы жұмыстар биыл қараша айында аяқ­­­талмақ.
Алға ауданы әкімінің орынбасары Талғат Сұлта­нов­тың айтуынша, резервуарлар іске қосылғаннан кейін қа­лада 10 мың текше метрге жуық су қоры қалыптасады. Бұл, әсіресе жаз мезгілінде су жүйесіне түсетін жүктеме арт­қанда қаладағы су тапшылығы мәселесін толығымен ше­шуге мүмкіндік береді.
– Бүгінде Алға тұрғындарын сапалы әрі үздіксіз ауыз­сумен қамтамасыз ету – басты міндеттердің бірі. Осы мақсатта қалада жаңа су қоймалары салынып, су желілері жаңартылуда. Барлық жоспарланған жобалар аяқталған соң, қала тұрғындары жыл бойы тұрақты түрде ауызсу­мен қамтамасыз етілетін болады, – деді облыс әкімі Асхат Шахаров.

Кешен және көпір

Бүгінде Алға қаласындағы орталық стадионға күрде­лі жөндеу жұмыстары жүргізілуде. Сондай-ақ мұнда дене шынықтыру-сауықтыру кешені салынып жатыр.
Атап айтсақ, стадионда газон жамылғысы ауыс­ты­ры­лып, жаңа жүгіру жолы жасақталуда. Мердігер ұйым — «АрысСтройКом» ЖШС жөндеу жұмыстарын биылғы қара­ша айында аяқтауды жоспарлап отыр. Жаңартылған стадионның сыйымдылығы – 1 500 орын.
Ал спорт кешеніне монолитті конструкциялар орна­ты­лып, инженерлік желілер тартылуда. Кешенді осы жыл­дың соңында пайдалануға беру жоспарланып отыр. Жаңа нысан Алға тұрғындарының спортпен айналысуы мен салауатты өмір салтын дамытуда маңызды орталық бол­мақ.
Асхат Шахаров спорттық инфрақұрылымды дамыту – салауатты өмір салтын қалыптастырудың және жас­тар­ды спортқа тартудың басты құралдарының бірі еке­нін атап өтті. Сондай-ақ, жобалардың уақытылы және са­палы орындалуы үшін барлық жұмыстарға қатаң ба­қылау қажет екенін жеткізді. Бұл аудан деңгейінде жап­пай спортты дамыту үшін қолайлы жағдай жасауға мүм­­­­кіндік береді.
Сонымен қатар өңір басшысы Бесқоспа ауылдық ок­ругінде салынып жатқан көпірдің де құрылысымен та­нысты.
Аталған округ әкімі Нұржан Тәженовтің айтуынша, кө­пірге жол жабынының бірінші қабаты төселген. Жал­пы құрылысты аяқтап, нысанды пайдалануға беру қазан айының соңына жоспарланып отыр. Жаңа көпір 1950 жылы салынған ескі көпірдің орнына тұрғызылуда.
Сондай-ақ округ орталығы — Есет батыр ауылында ұзын­дығы шамамен төрт шақырымды құрайтын екі кө­ше­нің жолы жөнделіп жатыр. Жұмыстарға «Жылу ХХІ» ЖШС жауапты. 
Бұдан бөлек, елді мекенде көше жарықтандыру мә­се­лесі де шешімін тапты.
– Көпірді салудағы мақсат — Шолақ өзені арқылы ке­летін суды кедергісіз өткізу, әсіресе су тасқыны кезінде қауіпсіздікті сақтау. Сонымен қоса, ауылдарды дамыту жә­не тұрғындардың әрі-бері жүруіне қолайлы жағдай жа­сау. Ол – жұмысымыздың басты бағыттарының бірі. Біз инфрақұрылымды жаңартуға, жолдар мен әлеуметтік ны­сандар салуға назар аударуды жалғастырамыз. Мұның бәрі халықтың қолайлығы мен қауіпсіздігі үшін жа­салу­да, – деді облыс әкімі.

Цемент зауыты 
салынып жатыр

Алға ауданының аумағында қазір цемент зауыты са­лынып жатыр. Бұл жобаны жүзеге асырушы — Ақтөбе облысы мен West China Cement компаниясы.
Кәсіпорын жылына 2 миллион тонна цемент өн­діруге қауқарлы. Жобаның жалпы құны — 120 миллиард теңге. Нысан құрылысы 2026 жылдың соңына қарай аяқ­талады деп жоспарланған. Бүгінде жобаға 1 000-ға жуық жұмысшы тартылыпты. Қазір инженерлік же­лілерді тарту және қызметкерлерге арналған жа­тақ­хана құрылысы жүргізілуде. Ал зауыт іске қосылғанда, кә­сіпорында 500 тұрақты жұмыс орны ашылады.
Облыс әкімі Асхат Шахаров жобаның жүзеге асы­рылу барысымен танысты. 
Aktobe Cem ЖШС-на қарасты цемент зауыты Ақ­төбе облысы мен ҚХР арасындағы байланысты нығайта түс­пек. Жоба құрылысы өңірдің өнеркәсіптік әлеуетін арт­тырып, инфрақұрылымды дамытуға және өңірге қо­сымша инвестициялар тартуға серпін береді.
– Алға инвестициялар тартудың орталығына ай­на­лу­да. Мұндай зауыттың іске қосылуы жаңа жұмыс орын­да­рын ашып, облыстың индустриялық әлеуетін арт­ты­ру­ға зор үлес қосады. Мемлекет басшысы өз Жолдауында шикізатты терең өңдеу, импортты алмастыру міндеттерін қой­ды. Осы жоба цемент импортына тәуелділікті азай­тып, ішкі нарықты құрылыс материалдарымен тұрақты қам­тамасыз етуге мүмкіндік береді. Ең бастысы, құрылыс кес­теге сай және барлық технологиялық талаптарды сақ­тай отырып жүргізілуі қажет, — деді Асхат Шахаров.

Данагүл ҚАЗИХАН,
Ақтөбе облысы