Осы аптада Ақтөбе облысы Мәртөк ауданына қарасты Бөрте, Қызылжар, Шевченко ауылдарына көгілдір отын берілді. Қазір тұрғындардың қуанышында шек жоқ. Олар көп жылғы бейнеттен құтылғанына дән риза.
Аудандағы үш елді мекенді газбен қамтуға бағытталған жобаны «Ерзат» өндірістік кооперативі жүзеге асырды. Жоба құны – 1,4 млрд теңге. Аталған қаражатқа 74 шақырым газ құбыры тартылды.
Қызылжар ауылдық округінің әкімі Арман Ахметовтің айтуынша, бұл қуанышты округ тұрғындары ұзақ күткен.
– Біздің ауылдық округ аудан орталығынан 60 шақырым қашықтықта орналасқан. Округ құрамына Шевченко, Қызылжар, Бөрте ауылдары кіреді. Бүгінде Шевченко ауылында – 52, Қызылжарда – 110, Бөртеде 115 түтін бар. Ал әлеуметтік нысандарға келсек, округте 3 мектеп, 3 клуб, екі кітапхана, бір медициналық амбулатория, екі медициналық пункт бар. Округтің үш елді мекені орталықтандырылған ауызсумен қамтылған. Қазір үш ауылдың 75 пайызы газға қажетті құрал-жабдықтарын сатып алып, құжат рәсімдеу жұмыстарын жүргізіп жатыр, – дейді ауыл әкімі.
Биыл Бөрте және Шевченко ауылдық клубтарына жылу жүйесі жүргізілген. Ауылдық округтегі барлық елді мекен көшелері жарықтандырылған. Үш елді мекенде де Activ және Beeline операторларының ұялы байланысы, сондай-ақ Globus Telecom компаниясының жоғары жылдамдықты интернеті бар. Округтегі 3 табиғи бұлақ қалпына келтіріліп, абаттандырылған.
Қызылжар округінің орталығы – Қызылжар ауылының тұрғыны, зейнеткер, жеке кәсіпкер Әділбек Қуановтың айтуынша, көгілдір отынның келуі елді мекеннің дамуына серпін береді. Әсіресе, мұндағы жеке кәсіпкерліктің өркендеп, дамуына ықпал етпек.
– Өзім Қызылжар ауылына Ақтөбе қаласынан 13 жыл бұрын көшіп келгенмін. Біз осында келгенде ауылда жол да, байланыс та, ауызсу да болған жоқ. Міне, қазір барлық инфрақұрылым бар, газ да келіп жатыр. Өте қуаныштымыз. Осы күнге дейін көп жыл тезек, көмір, ағаш жағып келдік. Күз айларында отын тасып, біраз қиындық көретінбіз. Енді сол бейнеттен арылдық. Ауылымызға 2017 жылы ауызсу келіп, бір қуанған едік. Міне, тағы қуанышқа кенеліп жатырмыз, – дейді ауыл тұрғыны.
Әділбек Қуанов зейнет жасында болса да әлі күнге дейін жеке кәсіппен айналысады. Ол ара өсіріп, алған өнімін облыс, аудан тұрғындарына сатады. Бұдан бөлек, қой, жылқы бағады. Жеке шаруашылығы бар.
Оның айтуынша, Қызылжар ауылында бала саны азайған, қазір балабақша жұмыс істемей тұр. Сондықтан ауылға көшіп келетіндер болса мұнда барлық жағдай бар. Сондай-ақ ауылдағы дәрігерлік амбулаторияға дәрігер керек.
– Ауылдағы орта мектеп ғимараты осыдан бірнеше жыл бұрын күрделі жөндеуден өтті. Көшелерге жол салынып, интернет жұмыс істеп тұр. Қазір мал бағып, жеке кәсіппен айналысып жатқан ауылдастарымыз көп. Жастар да еңбекқор, әр салада жетістіктерге жетіп жатыр, – дейді зейнеткер.
Ал Бөрте ауылының тұрғыны, 72 жастағы ардагер Ақборық Есмағамбетова – отбасында 8 бала тәрбиелеп өсірген көпбалалы ана. Бүгінде сол ұрпағынан 15 немере, 4 шөбере сүйіп отыр.
– Бұрын үйді көмір мен тезек жағып, жылыттық. Үйдің іші күл мен қоқыстан тазармайтын. Енді газ келді, бәрі жеңіл болады, тұрмысымыз да жеңілдейді. Бұл – біз үшін ерекше қуаныш, – дейді ол.
Мәртөк ауданының әкімі Медет Ысқақовтың айтуынша, биыл ауданда бірқатар әлеуметтік маңызы бар жобалар жүзеге асырылуда. Мысалы, Мәртөк ауылында Өнер орталығы мен өрт сөндіру бекетінің жаңа ғимараты салынып жатыр.
Білім беру саласы бойынша Сарыжар ауылында бала санының өсуіне байланысты 300 орындық «Жайлы мектеп» жуырда ашылды. Мәртөк ауылындағы №3 Мәртөк орта мектебінде спортзал құрылысы жүргізілуде. Сондай-ақ Кеңсахара ауылында 100 орындық, Достық ауылында 60 орындық жаңа мектеп құрылысы басталды. Мәртөк және Жайсаң ауылдарында теміржолдан өтуге арналған жаяу жүргіншілер көпірін салу бойынша құжаттар да әзірленуде.
– Мәртөк ауданында 32 елді мекеннің 24-і орталықтандырылған ауызсумен қамтамасыз етілген. Мәселен, 2021-2022 жылдары халық саны 200 адамнан төмен 8 ауылға кешенді блок-модульді су тазарту стансасы орнатылды. Нәтижесінде, 670 тұрғын таза ауызсумен қамтылды. Бүгінде Хазірет және Кеңсахара ауылдарында су құбыры желілерін қайта жаңарту үшін құжаттар әзірленіп жатыр. Сонымен қатар Шевченко ауылының ауызсу жүйесін жақсарту мақсатында су айдау бекетіне су тазарту фильтрі орнатылды. Қазір 20 ауылдың тұрғыны көгілдір отынға қол жеткізіп отыр. Аққайың ауылында тартылатын және кентішілік газ құбырын салу бойынша жұмыстар қолға алынуда. Жобаны іске асыруды бастауға облыстық бюджеттен 33,9 миллион теңге қаржы бөлінді, – дейді аудан әкімі.
Оның айтуынша, ауданда жол салу бойынша жобалар да қарқынды жүзеге асырылуда. Мәселен, «Родниковка-Мәртөк» бағытындағы жолға орташа жөндеу, республикалық маңызы бар «Батыс Еуропа – Батыс Қытай» магистралі бойында 37,5 шақырым жолға күрделі жөндеу жүргізіліп жатыр. «Мәртөк – Дмитриевка – Байторысай – Полтавка» және «Байторысай – Шевченко» бағыттарындағы жолдар да орташа жөндеуден өтуде.
Ал өткен айда «Қызылжар – Бөрте» бағытындағы көпірдің құрылысы басталды.
– «Мәртөк-Қаратаусай» (0-11,4 шақырым) жолы бойынша жұмыстар толық аяқталған жоқ, жобаға түзету енгізілуде. Ауыл жолдарға да қиыршық тас төселіп, тегістеу жұмыстары жүргізіліп жатыр. Былтыр Сарыжар ауылында Әйтеке би, Иманов, Әл-Фараби, Абай көшелеріне асфальт төселді. Қазіргі таңда аудан орталығы Мәртөк ауылының 10 көшесіне қиыршық тас төселіп тегістелді және 6 көшесіне асфальт төселді. Мәртөк ауылының жаңақоныс аумағында 6 шақырым жолға қиыршық тас төселіп, су өткізу құбыры орнатылды. Жалпы, ауданда барлық сала тұрақты дамып келеді. 30 мыңға жуық тұрғыны бар Мәртөк ауданы өзге аудандардан марал, егін шаруашылығымен ерекшеленеді. Ал биыл аудандағы бірқатар ауылға көгілдір отынның келуі – біз үшін зор қуаныш. Газ келсе, ауылдар дамып, жеке кәсіпкерлер саны артады, шаруашылықтар жұмысын кеңейтеді, – дейді Медет Ысқақов.
Ақтөбе облыстық Энергетика және тұрғын үй-коммуналдық шаруашылығы басқармасының басшысы Арысұлан Айтбаевтың айтуынша, биыл Мәртөк ауданында 16 елді мекенге газ берілген, жыл соңына дейін тағы 12 ауыл газ құбырына қосылады. Қазір мұндағы 32 елді мекеннің 17-сі немесе 25 712 тұрғын газбен қамтылған.
– Биыл жыл соңына дейін көгілдір отынмен қамтылған ауылдардың саны 23-ке жетіп, халықтың газбен қамтылу деңгейі 94 пайыз болады. Алдағы жоспарымызда аудандағы Хазірет, Ақмоласай, Байнассай, Аққайың ауылдарына газ жеткізу, сондай-ақ Полтавка мен Покровкада құрылыс жұмыстарын бастау міндеті тұр. Бұдан бөлек, Дмитриевка, Құрмансай ауылдарына газ құбырын тарту үшін жобалық-сметалық құжаттар әзірленуде. Бұл бағыттағы жұмыстар келесі жылы да жалғасады, – дейді Арысұлан Айтбаев.
Данагүл ҚАЗИХАН,
Ақтөбе облысы