Халықаралық NetBlocks мониторинг қызметі Ауғанстан аумағында интернет байланысының толық жоғалғанын хабарлады. Ұйымның мәліметінше, интернет «Талибан» қозғалысының «имандылықты сақтау» саясатына байланысты өшірілген, деп хабарлайды turkystan.kz.
NetBlocks нақтылағандай, елде телефон байланысында да үзілістер байқалады. AP агенттігінің атап өтуінше, бұл – талибтер 2021 жылғы тамызда билікке келгеннен бергі интернеттің ауқымды түрде ажыратылуының алғашқы жағдайы.
Бұған дейін, қыркүйек айының ортасында, билік солтүстік өңірлерде интернетке қол жеткізуді шектеген еді. Сол кезде Балх провинциясында талшықты-оптикалық интернеттің жұмысы уақытша тоқтатылды. Үкімет өкілі бұл қадам «адамгершілікке жат қылықтардың алдын алу үшін» жасалғанын айтып, балама инфрақұрылым құруға уәде берген.
Алайда Reuters мәліметінше, ол кезде бірден бес провинцияда – Балх, Кундуз, Бадахшан, Баглан және Тахарда интернет ажыратылды. Интернетсіз мемлекеттік мекемелер, кәсіпорындар және жеке пайдаланушылар қалған. Дегенмен, сол уақытта мобильді байланыс жұмыс істей берген.
29 қыркүйекте NetBlocks деректеріне сәйкес, ел толығымен жаһандық желіден оқшауланды.