Оралда жеңіл автокөлік бағанаға соғылып, салдарынан жолаушы қаза тапты, деп хабарлайды turkystan.kz.
Әлеуметтік желілерде куәгерлердің зардап шеккендерге көмек көрсетіп жатқан сәті бейнеленген видео тарады.
Полицияның мәліметінше, жол-көлік оқиғасы түнгі сағат бір жарым шамасында Күлтегін көшесінде болған.
"ВАЗ-2114 автокөлігінің жүргізушісі көлікті басқара алмай, жарық шамының тірегіне соғылған. Қатты соққыдан бағана құлап, көлік аударылып, сайға ұшып түсті", – деп хабарлады облыстық ПД.
Белгілі болғандай, 21 жастағы жолаушы ауыр жарақат алып, ауруханада көз жұмды. 19 жастағы жүргізуші қамауға алынып, уақытша ұстау изоляторына жеткізілді.
Оқиғаға байланысты қылмыстық іс қозғалды.