Ұлттық статистика бюросының деректеріне сәйкес, өткен жылы елдегі неке агенттіктері мен танысу бюроларының қызмет көлемі 2,29 млрд теңгеге жетті, деп хабарлайды turkystan.kz.
Салыстыру үшін: 2023 жылы ресми көрсеткіштер небәрі 97,7 млн теңгені құраған. Дегенмен мамандар жылдар арасындағы динамиканы тікелей салыстыру дұрыс емес екенін атап өтеді: деректерді жинау әдістемесі әртүрлі және жыл сайын іріктеуге әр аймақ әрқалай кіреді.
Мысалы, 2024 жылы жалпы қызмет көлемінің 98,6%-ы, яғни 2,25 млрд теңгесі Алматыға тиесілі болды. 2023 жылы оңтүстік астана мұндай нәтижелерді көрсеткен жоқ. Қалған көлем Түркістан және Абай облыстарындағы кәсіпкерлер үлесіне тиді, ал бір жыл бұрын бұл өңірлерде статистика нөл болған. Сондықтан әзірге есептіліктің тұрақтылығы туралы айту мүмкін емес.
«2,3 млрд теңге – толық көрініс емес. Статистикаға онлайн-дейтинг сервистері кірмейді, себебі олар басқа қызмет түрлері бойынша (мысалы, ақпараттық қызметтер) тіркелген, сондай-ақ ресми тіркелмей жұмыс істейтін «жеке делдалдар» да ескерілмейді, ал бұл салада олардың саны аз емес», – дейді сарапшылар.
Шартты түрде нарықтағы қызметтерді екі бағытқа бөлуге болады. Біріншісі – қосымшаларда немесе танысу сайттарында жазылымдар, премиум-қолжетімділік және алға жылжыту. Бағасы форматқа және таңдалған сервиске байланысты 1 мыңнан 270 мың теңгеге дейін өзгереді.
Екінші бағыт – офлайн-қызметтер: жеке консультациялар, speed dating форматындағы іс-шаралар немесе неке агенттіктері мен кәсіби құдалардың көмегі. Бір реттік консультация 15-тен 25 мың теңгеге дейін, ал кешенді серіктес іріктеу әлдеқайда қымбатқа түседі. Агенттіктер бағасын өздері белгілейді: кейбірі белгіленген кандидаттар саны үшін, енді бірі белгілі бір мерзім үшін. Алты айлық сүйемелдеу 75 мың теңгеден басталып, бір жылдық қызмет 140-150 мың теңге шамасында тұрады. Күйеу немесе қалыңдықты «кілтке» табу өңірлерде 300 мың теңгеден, мегаполистерде 500 мың теңгеге дейін жетеді.