Белгілі сарапшы Ақтілек Жақсыбек Конституция күні қарсаңында институт зерттеулерінен Ата заңымыз туралы түрлі дерек ұсынды, деп хабарлайды turkystan.kz.
"Ата заңымыз – тәуелсіздігіміздің берік негізі. Бұл – жай ғана баптар жинағы емес, билік пен қоғам арасындағы келісім. Еліміздегі әрбір азаматтың құқықтары мен бостандығын қорғай отырып, ортақ жауапкершілікті еске салады. Заң үстемдігі сенімге сүйенеді. Сенім бар жерде қауіпсіздік орнайды, қауіпсіздік бар жерде даму мен өркендеу болады", – дейді Ақтілек Жақсыбек.
Сарапшы соңғы 30 жыл елдің құқықтық жүйесін қалыптастыру, түзету мен түйін жасау кезеңі екенін баса айтты.
"Президент: «Конституция әрдайым адам құқығының темірқазығы болуға тиіс. Бұл – мемлекет саясатындағы бұлжымас қағида. Конституциямыз алдағы уақытта да халқымыздың жарқын болашағына жол ашатын ең басты құжат болып қала бермек», – деді. Соңғы 30 жыл – елдің құқықтық жүйесін қалыптастыру, түзету мен түйін жасау кезеңі. Ал соңғы 3 жылдағы өзгертулер Конституцияны заман талабына бейімдеу, әділдік пен ашықтықты нығайтуға бағытталған қадамдар болды. Бұл өзгертулер баптардың мәтінін ғана емес, олардың мағынасын күнделікті өмірге белсенді түрде енгізуді қажет етеді. Соттың әділ өтуі, ашық басқару, азаматтарға тең мүмкіндіктер тәрізді қағидалар қоғамда әділет сезімін орнықтырып, билікке деген сенімді күшейтеді", – дейді сарапшы.