Бүгін Алматы қаласында, жаңа 2025–2026 оқу жылының қарсаңында және Қазақстан Республикасының Конституциясының 30 жылдығына орай, «AMANAT» партиясының «Бақытты отбасы» жобасы аясында дәстүрлі «Баланы мектепке дайындайық!» қайырымдылық акциясында 200 балаға мектеп құралдары табысталды, деп хабарлайды turkystan.kz.
Аталған игі дәстүр 2010 жылдан бері үздіксіз жалғасып келеді. Оның негізгі мақсаты – балаларды жаңа оқу жылына дайындап қана қоймай, оларға қуаныш сыйлап, білімге деген ынтасын арттыру, ата-аналарға қолдау көрсетіп, қоғамда қайырымдылық пен өзара жәрдемдесу дәстүрін нығайту.
Іс-шараға қатысқан «AMANAT» партиясының Алматы қалалық филиалының төрағасы Станислав Канкуров ата-аналарды және бүлдіршіндерді мерекемен құттықтап, жылы лебізін білдірді. Ол өз сөзінде:
– Ең алдымен баршаңызды Конституциямыздың 30 жылдығымен және жаңа оқу жылының басталуымен құттықтаймын. «Баланы мектепке дайындайық!» акциясы 2010 жылдан бері тұрақты түрде өтіп келеді. Жыл сайын мәслихат депутаттарының, партия белсенділері мен кәсіпкерлердің қолдауымен екі мыңға жуық алматылық оқушы мектепке қажетті құрал-жабдықтармен қамтамасыз етіледі. Бұл – болашағымыздың кепілі саналатын жас ұрпаққа жасалып отырған нақты қамқорлық, – деп атап өтті.
Бұл жолғы акцияға партия мүшесі, белгілі кәсіпкер, бизнес-тренер Аманжол Советбекұлы Рысмендиев демеушілік етті. Оның қолдауымен оқушыларға мектеп сөмкелері мен оқу құралдары табысталды. Станислав Канкуров қайырымдылыққа қосқан үлесі үшін демеушіге партия атынан Алғыс хат тапсырды.
Сонымен қатар іс-шара барысында Ariding International компаниясының өкілі Ақмаржан Бақытқызы сөз сөйлеп, әлеуметтік жауапкершіліктің бизнес үшін де маңызды екенін атап өтті.
Жиналған ата-аналар атынан да жылы лебіздер айтылып, балаларға жаңа оқу жылына сәттілік тіледі. Балдырғандарға арнайы дайындалған мектеп сөмкелері партия филиалының төрағасы мен демеушілердің қолынан табыс етілді.
Ұйымдастырушылардың айтуынша, мұндай қайырымдылық іс-шаралары балалардың болашағына сенім ұялатып қана қоймай, қоғамда бірлік пен өзара қолдау құндылықтарын нығайта түседі.