قر باس پروكۋراتۋرا مەن بۇۇ ءوزارا مەموراندۋمعا قول قويدى

قازاقستان رەسپۋبليكاسىنىڭ باس پروكۋرورى جاقىپ اسانوۆ اۆسترياعا جۇمىس ساپارىمەن باردى.

دەلەگاتسيا قۇرامىندا قۇقىق قورعاۋ ورگاندارى اكادەمياسى رەكتورىنىڭ مىندەتىن اتقارۋشى نايل احمەتزاكيروۆ بولدى. ساپار بارىسىندا جاقىپ اسانوۆ بۇۇ باس حاتشىسىنىڭ ورىنباسارى يۋري فەدوتوۆپەن ءوزارا تۇسىنىستىك تۋرالى مەموراندۋمعا قول قويدى، دەپ حابارلايدى ۆەدومستۆونىڭ ءباسپاسوز قىزمەتى.

يۋ. فەدوتوۆ جاسالىپ وتىرعان كەلىسىمنىڭ ماڭىزىنا ەرەكشە ءمان بەرىپ: «بۇل ءبىز ءۇشىن ماڭىزدى وقيعا. سەبەبى ول ورتالىق ازيا ءوڭىرى ەلدەرىنە ەكسترەميزم مەن تەرروريزمنەن، ترانسۇلتتىق ۇيىمداسقان قىلمىستان تۋىندايتىن الەمدىك قاۋىپتەرمەن كۇرەستە، قاۋىپسىزدىك پەن تۇراقتىلىقتى ساقتاۋدا ءوزىنىڭ كۇش-قۋاتىن قالپىنا كەلتىرۋگە مۇمكىندىك بەرەدى. ءبىز قازاقستانعا قولداۋ كورسەتىپ وتىرعانى ءۇشىن العىسىمىزدى بىلدىرەمىز، وسى باعىتتا بىرىگىپ جۇمىس جاسايتىن بولامىز»، – دەپ اتاپ ءوتتى.

قازاقستان باس پروكۋراتۋراسىنىڭ قۇقىق قورعاۋ ورگاندارى اكادەمياسىنىڭ بازاسىندا وڭىرلىك حاب قۇرىلۋدا. بۇل قۇقىق قورعاۋ جانە ارنايى ورگانداردىڭ قىزمەتكەرلەرى بەس جاھاندىق قاۋىپكە قارسى ءىس-قيمىلدىڭ الدىڭعى قاتارلى الەمدىك تاجىريبەسى مەن وزىق تەحنولوگيالارىن ۇيرەنەتىن ورتالىق ازياداعى بىرىڭعاي الاڭ.

ولار: 1) ەكسترەميزم مەن تەرروريزم;

2) ەسىرتكى مەن قارۋدىڭ زاڭسىز اينالىمى;

3) ادام ساۋداسى;

4) كيبەرقىلمىس;

5) سىبايلاس جەمقورلىق.

وسى بەس باعىت بويىنشا ەلىمىزگە شەتەلدىڭ ۇزدىك وقىتۋشىلارى كەلەتىن بولادى. بۇدان بولەك، وڭىرلىك حابتى قۇرۋ ورتالىق ازيا ەلدەرىنىڭ قۇقىق قورعاۋ ورگاندارىمەن بىرلەسكەن زەرتتەۋلەر جۇرگىزۋگە مۇمكىندىك بەرەدى. ساپار بارىسىندا باس پروكۋرور ەقىۇ-نىڭ باس حاتشىسى لامبەرتو زانەرمەن كەزدەستى. جاقىپ اسانوۆ قازاقستان مەن ەقىۇ-نىڭ ءوزارا ارەكەتتەسۋ دەڭگەيىن جوعارى باعالادى. «ءبىزدىڭ ەلىمىز ۇيىممەن حالىقارالىق قاۋىپسىزدىكتى نىعايتۋدىڭ بارلىق ماڭىزدى قىرلارى بويىنشا، ەڭ الدىمەن، قازىرگى زامانعى قاۋىپ-قاتەرلەرمەن كۇرەس سالاسىندا ىنتىماقتاسۋدا»،- دەدى ول. تاراپتار جاھاندىق قاۋىپ-قاتەرلەرگە قارسى وڭىرلىك حاب قۇرۋ اياسىنداعى ىنتىماقتاستىقتىڭ نەگىزگى باعىتتارىن تالقىلادى. كەزدەسۋدىڭ ناتيجەلەرىن قورىتىندىلاي كەلە ەقىۇ باسشىسى جوبانى جىلجىتۋعا ىقپال ەتۋگە دايىن ەكەنىن ءبىلدىردى.

«بىزگە زورلىق-زومبىلىق سيپاتىنداعى ەكسترەميزم، ەسىرتكى بيزنەسى، سىبايلاس جەمقورلىق، زاڭسىز كىرىستەردى جىلىستاتۋمەن كۇرەستە كۇش بىرىكتىرۋ كەرەك. سوندىقتان اكادەميانىڭ حاب قۇرۋ باستاماسى وتە ورىندى جانە وزەكتى. بۇل يدەيا ەقىۇ تاراپىنان تولىقتاي قولداۋ تابادى. وسى ماقساتتا بىزدەر حالىقارالىق ساراپشىلار قاۋىمداستىعىنىڭ ۇزدىك تاجىريبەسىن تارتۋىمىز كەرەك»، – دەپ اتاپ كورسەتتى ل.زانەر.

سونداي-اق باس پروكۋرور سىبايلاس جەمقورلىققا قارسى حالىقارالىق اكادەميانىڭ رەكتورى مارتين كريويتنەرمەن كەلىسسوز جۇرگىزدى. ولار ەكى اكادەميانىڭ الدىندا تۇرعان ماقساتتار مەن مىندەتتەردىڭ ورتاق ەكەنىن اتاپ ءوتتى جانە ءوزارا ءتيىمدى ىنتىماقتاستىق ورناتۋعا قىزىعۋشىلىق تانىتتى.

سونىمەن قاتار ج.اسانوۆ اۆستريادا ءبىلىم الىپ جۇرگەن قازاقستاندىق ستۋدەنتتەرمەن كەزدەستى. باس پروكۋرور ينستيتۋتسيونالدىق رەفورمالاردى جۇزەگە اسىرۋ بويىنشا جاسالىپ جاتقان جۇمىستار، پروكۋراتۋرانى جاڭعىرتۋ جانە كادرلىق قۇرامدى ساپالى جاڭارتۋ جونىندەگى شارالار تۋرالى ايتىپ ءوتتى جانە ستۋدەنتتەردىڭ سۇراقتارىنا جاۋاپ بەردى.

ۇقساس جاڭالىقتار

Back to top button