Жетісу мен Алматы облысында 5 пайыздық үстемемен жеңілдетілген ипотекалық бағдарламалар іске қосылып жатыр. Екі өңірдің жұмыспен қамтылған тұрғындары несие ала алады, деп хабарлайды turkystan.kz.
Жетісу облысының тұрғындарына арналған "Маман" ипотекасы
"Крыша" порталының мәліметіне сүйенсек, "Маман" ипотекасы да 25 тамызда іске қосылады. Оған Жетісу өңірінде тұратын, жұмыс істейтін келесі мамандық өкілдері қатыса алады:
- журналистер мен БАҚ қызметкерлері;
- медицина қызметкерлері: дәрігерлер, медбикелер, фельдшерлер және басқалар;
- мектепке дейінгі мекемелердің, мектептер мен колледждердің қызметкерлері: бала күтушілер, тәрбиешілер, мұғалімдер;
- мәдениет қызметкерлері мен шығармашылық одақтардың мүшелері;
- мемлекеттік спорт ұйымдарындағы спортшылар мен жаттықтырушылар;
- энергетиктер;
- "Азаматтарға арналған үкімет" мемлекеттік мекемесінің қызметкерлері;
- туризм секторының қызметкерлері;
- саяси партиялар филиалдарының қызметкерлері.
"Маман" ипотекасының шарттары төмендегідей:
- мөлшерлемесі – 5 пайыз;
- несиенің ең жоғары сомасы – 20 млн теңге;
- бастапқы жарна – 10 пайыз;
Бұл бағдарлама баллдық жүйемен жұмыс істейді.
Одан бөлек, қатысушыға Жетісу өңірінде кемінде 3 жыл тұрақты тіркеуде тұру, облыста бір жылдан кем емес жұмыс өтілінің болуы; соңғы 5 жыл ішінде үйге меншік құқығының болмауы (өтініш беруші мен оның отбасы мүшелерінде) сияқты талап қойылады.
Бағдарламаны жүзеге асыруға барлығы 1 млрд теңге бөлінді. Қатысуға өтінімдер 2025 жылдың 5 қыркүйегіне дейін қалалық және аудандық тұрғын үй-коммуналдық шаруашылық бөлімдерінде қабылданады.
"Маман" ипотекасына қатысуға өтініш беру үшін алдымен әкімдіктен жолдама алу қажет. Сондай-ақ құжаттар мен анықтама жинау қажет:
- қатысушының және жұбайының жеке куәліктері;
- неке/ажырасу/туу туралы куәліктер;
- соңғы 6 немесе 12 айдағы жалақы туралы анықтама;
- зейнетақы жарналарынан көшірме;
- жылжымайтын мүліктің жоқ екені туралы анықтама;
- кәсіпкерлер үшін – PDF форматындағы соңғы 12 айдағы банк шотынан үзінді көшірме.
Осылайша Қазақстанда пайыздық мөлшерлемесі төмен тағы екі жеңілдетілген ипотека ашылмақ.
Алматы облысының тұрғындарына арналған "Алатау" ипотекасы
"Крыша" порталының хабарлауынша, биыл 25 тамыздан бастап Алматы облысында "Алатау" ипотекалық бағдарламасы іске қосылады. Оның шарттары:
- мөлшерлемесі – 5 пайыз;
- несиенің ең жоғары сомасы – 30 млн теңге;
- бастапқы жарна – 10 пайыз;
- қатысушыларды іріктеу кезінде үміткердің отбасылық жағдайына, балаларының болуына, жұмыс тәжірибесіне қарай ұпайлар беріледі.
Бұл бағдарламаға 18 бен 60 жас аралығындағы тұрғын үйі жоқ Қазақстан азаматтары, атап айтқанда: мемлекеттік қызметшілер, бюджеттік сала қызметкерлері және спортшылар қатыса алады.
Бағдарламаны жүзеге асыруға барлығы 3,7 млрд теңге бөлінді. 120-ға жуық адамға кредит беріледі деп күтіліп отыр.
Айта кетейік, ипотекаға әзірге онлайн түрде өтініш беру мүмкін емес. Өтініштер Қонаев қаласы, Қонаев көшесі, 7/1, "Отбасы банк" ғимаратының бірінші қабатында қабылданады.