Финляндия парламентінің депутаты сейсенбі күні заң шығарушы орган ғимаратында өзіне қол жұмсағаны туралы ақпарат тарады, деп хабарлайды turkystan.kz.
Бұл жөнінде елдің бұқаралық ақпарат құралдары мәлімдеді.
«Сейсенбі күні парламент ғимаратында адам қаза тапты. Полицияға қоңырау дабыл орталығы арқылы түсті», – деп жазады Yle порталы Хельсинки полиция басқармасына сілтеме жасап.
Қазіргі уақытта полиция бұл істен қылмыс құрамын көріп отырған жоқ.
Оқиға орнында бірнеше полиция патрулі мен жедел медициналық көмек қызметтері жұмыс істеуде.
Парламенттің қауіпсіздік жөніндегі директоры Ааро Тойвонен марқұмның депутат немесе парламент қызметкері болған-болмағанын БАҚ-қа түсіндірмеді.
Сонымен бірге ол Iltalehti газетінің парламент ғимаратында депутат өзіне қол жұмсады деген хабарын жоққа шығармады.
Басылым марқұм депутаттың жеке басы белгілі екенін, бірақ туыстарымен байланыс орнатылғанша оның есімін жарияламайтынын атап өтті.