Энергетика министрлігі елдің оңтүстігінде электр энергиясына шектеулер енгізіледі деген ақпарат шындыққа сәйкес келмейтінін хабарлады.
"Энергетика министрлігі кейбір әлеуметтік желілерде тараған елдің оңтүстік өңірлерінде электр энергиясын шектеуге дайындық жүргізіліп жатыр деген ақпараттың ешқандай негізі жоқ екенін ресми түрде мәлімдейді. Ведомство азаматтар мен БАҚ өкілдерін тек ресми дереккөздерге сенуге шақырады", - делінген министрліктің хабарламасында.
Ведомствоның мәліметінше, қазіргі таңда Қазақстанның оңтүстік облыстарындағы тұтынушыларды электрмен жабдықтау жағдайы толықтай тұрақты деп бағаланады.
Электр энергиясын жеткізу қалыпты режимде жүзеге асырылып, халықтың да, өнеркәсіптік кәсіпорындардың да барлық қажеттіліктерін толық қамтып отыр.
Елдің бірыңғай электр энергетикалық жүйесі ешқандай ақаусыз жұмыс істеуде.
Энергетика министрлігі республика бойынша электр энергиясын өндіру мен тұтыну теңгерімін тұрақты бақылауда ұстайды.
Барлық өндіретін және жеткізуші компаниялар бекітілген кестелер аясында жұмыс істеп, энергожүйенің сенімділігін қамтамасыз етуде.
Осыған байланысты энергетика министрлігі бұқаралық ақпарат құралдарына, блогерлерге және онлайн-қоғамдастықтардың әкімшілеріне ақпаратты таратуға жауапкершілікпен қарауға, фактілерді мұқият тексеруге және азаматтарды жаңылыстырмау үшін тек ресми деректерді пайдалануға шақырады.