Әйгерім Алтынбек Италиядағы XI Халықаралық опера әншілеріне арналған Портофино байқауында төрт марапатқа ие болды, деп хабарлады turkystan.kz.
Жас әнші бірінші орынды және көрермен көзайымы жүлдесін, "Ең үздік әйел дауысы" аталымын, Карло Майердің арнайы жүлдесін жеңіп алды. Бұл — Қазақстан мәдениеті үшін тарихи жетістік.
"Байқау тарихында тұңғыш рет Әйгерім Алтынбек байқау басталған сәттен бастап, барлық қазылар алқасының бірауыздан бірінші орында деп таныған қатысушысы болды. Бұл — өте сирек кездесетін жағдай және көрермендердің оған Emotion Prize жүлдесін беруінің әділ болғанын дәлелдейді", — деді байқау қазылар алқасының төрағасы, белгілі опера менеджері Доменик Мейер.
Байқауға әлемнің түпкір-түпкірінен 200 өтінім түскен, олардың ішінен 92 үміткер жартылай финалға өтті. Ал соңғы кезеңде 10 финалист Генуя қаласындағы Teatro Carlo Felice оркестрімен бірге өнер көрсетті. Солардың арасынан Әйгерім бірнеше аталым бойынша озып шықты.
Айта кету керек, "Ең үздік әйел дауысы" жүлдесін Әйгерімге Ibáñez-Atkinson қоры (Чили) табыстады. Бұл ұйым әлемдегі талантты жас вокалистерді қолдайды және Сантьягодағы опера театрымен бірлескен жастар бағдарламасын дамытады. Әйгерім — қор қолдаған алғашқы еуропалық емес әнші, бұл оның Еуропадан тыс халықаралық мансабына жол ашатын маңызды қадам.
Ол қатты бәсекелестікке қарамастан, Қазақстан вокал мектебінің әлемдік деңгейде жаңа стандарттар орната алатынын дәлелдеді.
CLIP байқауы (Concorso Lirico Internazionale di Portofino) — Италияның Портофино қаласында жыл сайын өтетін, әлемдегі ең беделді опера байқауларының бірі. Қазылар алқасына Еуропаның жетекші опера театрлары — Вена операсы, Ла Скала, Глайндборн, Метрополитен және Театр Елисей алаңы сияқты мекемелердің режиссерлері мен импресариолары кіреді. Финалдық концерт ашық аспан астында өтеді және италиялық телеарналар арқылы көрсетіледі, мыңдаған көрермен жинайды.