Өткен аптада «Шымкент қаласының тұрақты дамуы: азаматтық қоғам институттарының рөлі» тақырыбында XII Азаматтық форум өтті. Бұл басқосу елімізде өтетін жалпыұлттық Азаматтық форум қарсаңында ұйымдастырылып, азаматтық сектор мен мемлекеттік құрылымдардың өзара әрекеттестігін тереңірек талқылауға арналды, - деп хабарлайды turkystan.kz тілшісі.
Форумның мақсаты – азаматтық бастамаларға қолдау көрсету, үкіметтік емес ұйымдар мен мемлекеттік органдар арасындағы байланысты нығайту, қоғам өміріне белсенді араласуға ынталандыру.
Жиынға ҮЕҰ өкілдерімен бірге мемлекеттік мекемелер, халықаралық ұйымдар, кәсіпкерлер мен бұқаралық ақпарат құралдарының қызметкерлері қатысты. Қатысушылар азаматтық қоғамның қала дамуына әсері, үкіметтік емес ұйымдардың тиімділігі мен қоғамдық бақылаудың рөлі туралы ой бөлісті.
Биылғы форум мазмұны мен форматы жағынан кеңейтіліп, бірнеше панельдік сессияны қамтыды. Пленарлық отырыста әлеуметтік серіктестік, мемлекеттік әлеуметтік тапсырыстың ашықтығы, жастар ресурстық орталықтарының әлеуеті, цифрлық шешімдер мен қоғамдық бақылау тетіктері сияқты маңызды тақырыптар қозғалды.
Сонымен қатар қатысушылар ашық пікірталастарға қатысып, сәтті жобалармен танысты. «ҮЕҰ өмірі – бір сәт бейнеде» атты фотокөрме форумға ерекше серпін берді.
Екі жылда бір өтетін бұл өңірлік форум азаматтық қоғамның қазіргі жағдайын бағалап қана қоймай, болашақтағы даму бағыттарын да айқындауға жол ашты. Әсіресе, азаматтық қоғамды дамыту тұжырымдамасының жергілікті деңгейде қалай жүзеге асып жатқанына ерекше көңіл бөлінді.
Ұйымдастырушылар барлық қатысушыларға алғыс білдіріп, азаматтық белсенділік пен қоғамға қызмет етудің маңызын атап өтті. Форум Шымкенттің инклюзивті әрі тұрақты дамуына оң ықпал етеді деген сеніммен қорытындыланды.