«Ақтау - Түркі әлемінің мәдени астанасы» жобасы аясында ұйымдастырылған «Даламен үндес баба өнер» атты халықаралық қолөнер шеберлерінің фестивалі өз мәресіне жетті.
Екі күнге созылған фестиваль аясында 11 елдің қолөнер шеберлері мәдени астана жылына арнап киіз басты. Сондай-ақ өңір тұрғындары әр ұлттың дәстүрлі қолөнерін тамашалап қана қоймай, туындылардың шығу тарихымен танысты. Фестивальдің жабылу салтанатында отандық және шетелдік дизайнерлердің туындыларынан сән көрсетілімі ұйымдастырылды. Атап айтқанда, Түрікменстан дизайнері Айна Дурдылыиева, қырғыз дизайнері Асылжан Қамбарова, Өзбекстан дизайнері Наргиза Мусажанова, Моңғолиядан келген Сувд Банзрагчтың туындылары және жергілікті «Жадағай», «Масакова», «Нұршах», «Тәрбия» сән үйлерінің топтамалары көрсетілді. Салтанатты жиынға ТҮРКСОЙ халықаралық ұйымының Бас хатшысы Сұлтан Раев қатысып, мұндай игі іс-шаралар тығыз ынтымақтастықтың арқасында жүзеге асып жатқанын айтты.
«Каспий теңізінің жағасында екі күн бойы ерекше мәдени кездесудің куәсі болдық. Дала рухын заманауи үлгімен ұштастырған бұл сән топтамалары тек киім немесе қолөнер бұйымы ғана емес, ортақ болмысымыздың, өткеніміз бен келешегіміздің символына айналды. Біз олардың әрқайсысымен мақтанамыз. ТҮРКСОЙ ұйымы ретінде біз ортақ мәдени мұрамызды дәріптеуді әрі осындай жобаларға қолдау көрсетуді жалғастыра береміз. Әрине, мұндай игі іс-шаралар тығыз ынтымақтастықтың арқасында жүзеге асуда. Баршаңызға шығармашылық табыс тілеймін, алдағы жобаларда да бірлесе жұмыс істеуді жалғастыра беруге ниеттіміз», – деді Сұлтан Раев.
Кеш барысында өнер иелеріне ТҮРКСОЙ халықаралық ұйымының Бас хатшысы Сұлтан Раев пен Маңғыстау облысы әкімінің орынбасары Аббат Өрісбаев арнайы марапаттар табыстады.
Сонымен қатар салтанатты іс-шараға арнайы шақырылған қонақ, дәстүрлі әнші Айгүл Елшібаева өнер көрсетіп, көрерменді әуезді әнмен тәнті етті.