Оқиға 28 маусым күні Сейфуллин көшесіндегі саябақ маңында сағат 15:00 мен 16:00 аралығында болған. Зардап шеккен баланың анасының айтуынша, оның ұлына жасөспірімдер шабуыл жасаған. Олар баланы жабыла ұрып, пышақпен қорқытқан, деп хабарлайды turkystan.kz.
Қазіргі уақытта жасөспірім мұрны сынып, миы шайқалып ауруханада жатыр. Шабуылға байланысты Түрксіб аудандық полиция басқармасына арыз түсті.
Зардап шеккен баланың отбасы қала тұрғындарынан көмек сұрайды. Шабуыл кезінде оқиғаның куәгері болған бір әйел жағдайды видеоға түсіріп алғаны белгілі.
Бала жақындары куәгерлерден тергеуге көмектесетін кез келген бейнематериал немесе ақпаратпен бөлісуді өтінеді.
Бұл дерек бойынша Түрксіб аудандық полиция басқармасы қылмыстық іс қозғаған.
«Қазіргі уақытта полиция қызметкерлері оқиғаның барлық мән-жайын және оған қатысы бар адамдарды анықтауға бағытталған тергеу амалдарын жүргізіп жатыр», — деп мәлімдеді ведомство.
Олардың айтуынша, әрбір қатысушының әрекетіне заң аясында құқықтық баға беріліп, тиісті шаралар қабылданады.