Атырауда әнші Мирас Жүгінісов пен Qanay-дың концерті күтпеген жерден тоқтатылды.
Іс-шара басталардан бұрын келген көрермендер концерт басталмай жатып тарап кетуге мәжбүр болды. Бұған себеп – ұйымдастырушылардың зал мен жабдықтар үшін жалдау ақысын төлемеуі.
— Біз ертерек келдік, бірақ ішке кіргізбеді. Ұзақ күттік. Кейін концерт болмайтыны, себебі жалдау ақысы төленбегені айтылды, – деді көрермендердің бірі.
Мирас Жүгінісов өзі далаға шығып, көрермендерден кешірім сұрады. Ол бұл жағдайдан өздері де алдын ала хабарсыз болғанын айтты.
— Біз де сахнаға шығу үшін ұзақ күттік, бәрі реттеледі деп үміттендік. Бірақ ұйымдастырушылар зал мен жабдыққа ақы төлемегені белгілі болды. Бұл үшін өте өкініш білдіреміз, – деді әнші.
Көрермендерге билет құны қайтарылатыны уәде етілді. Айта кету керек, кейбір көрермендер Кұлсары мен Оралдан келген екен.