Құлпынай тек жаздың белгісі ғана емес, денсаулыққа мол пайдасы бар жеміс. Қызыл түсті, хош иісті бұл жидек түрлі дәрумендер мен антиоксиданттарға бай. Дәмімен ғана емес, емдік қасиеттерімен де ерекшеленетін құлпынайды күнделікті рационға қосу салауатты өмір салтыңыздың бір бөлігіне айналуы мүмкін.
1. Иммунитетті нығайтады
Құлпынай С дәруменінің қуатты көзі. Бар-жоғы бір уыс құлпынай күнделікті қажет мөлшердің 100%-дан астамын қамтамасыз етеді. Бұл ағзаның ауруларға қарсы тұру қабілетін арттырады, әсіресе маусымдық тұмау мен суық тию кезінде өте пайдалы.
2. Жүрек саулығын жақсартады
Құлпынай құрамындағы антиоксиданттар – флавоноидтар мен антоциандар – жүрек-қан тамырлары жүйесіне оң әсер етеді. Олар холестерин деңгейін төмендетіп, қан айналымын жақсартады. Зерттеулерге сәйкес, құлпынайды жиі тұтынатын адамдарда инфаркт қаупі азаяды.
3. Терінің жасарып, жарқырауына көмектеседі
Құлпынай терінің табиғи досы. Ондағы С дәрумені мен антиоксиданттар теріні еркін радикалдардың зиянды әсерінен қорғайды. Сонымен қатар, құлпынай құрамындағы коллаген түзілуіне қатысатын элементтер терінің серпімділігін арттырады. Табиғи бет маскасы ретінде де жиі қолданылады.
4. Қан құрамындағы қантты тұрақтандыруға әсер етеді
Құлпынай гликемиялық индексі төмен жемістердің қатарына жатады. Бұл – оны тұтыну қандағы қант мөлшерін күрт көтермейді деген сөз. Сондықтан оны қант диабетімен ауыратын адамдар да белгілі бір мөлшерде мәзіріне қоса алады.
5. Ас қорытуды жақсартады
Құлпынайда жасұнық (клетчатка) көп. Ол асқазанның жұмысын жақсартып, іш қатудың алдын алады. Сонымен қатар, ішек флорасының дұрыс жұмыс істеуіне ықпал етеді.
Дегенмен, оны артық тұтыну кей жағдайда аллергиялық реакция тудыруы мүмкін, сондықтан қалыпты мөлшерде қолданған жөн.