Алматыда патрульдік полиция қызметкерлері пәтерді өртеп, өз-өзіне қол жұмсамақ болған қызды аман алып қалды, деп хабарлады turkystan.kz.
Алматыда "Буран-242" патрульдік полициясының экипажы өз-өзіне қол жұмсамақ болған жас келіншекті құтқарып, қайғылы оқиғаның алдын алды. Оқиға бір күн бұрын сағат 20:30 шамасында болды.
"102" қызметіне тұрғын үйлердің біріндегі пәтерде бойжеткен қамалып, өрт жасауға әрекеттеніп жатқаны туралы хабарлама келіп түскен. Куәгерлердің айтуынша, әйел өте тұрақсыз эмоционалды күйде болған және өзіне, басқаларға зиян келтіруі мүмкін еді. Оқиға орнына дереу "Буран-242" патрульдік полициясының экипажы жетті.
Бойжеткен отырған пәтер екінші қабатта болған. Есікті ешкім ашпады, ал кіреберісте күйік иісі сезілді. Полиция дереу әрекет етуді ұйғарды. Патрульдік полиция қызметкерлерінің бірі көрші пәтер арқылы балконға кіріп, сол жерден үй-жайдың ішіне кірген. Қыз бала жуынатын бөлмеде ес-түссіз жатқан. Залдың ортасында еденде шүберектер мен маталар жанып жатты.
Полицейлер жәбірленушіні тез арада таза ауаға шығарып, келген дәрігерлерге тапсырды. Олардың шешуші әрекеттерінің арқасында қайғылы оқиғаның алдын алып, адам өмірін сақтап қалу мүмкін болды.
"Біз жоғары көтерілген кезде, кіре берісте қатты күйік иісі сезілді. Ойланып тұруға артық уақыт жоқ екенін түсіндік. Өрт сөндірушілерді күту немесе есікті ашу тым ұзаққа созылатын еді. Сондықтан көршілер арқылы кіруді ұйғардық", - деді Алматы қаласы ПД ЖПҚБ патрульдік полиция полкінің инспекторы Қайсар Жеңіс.
"Біз бірден түрде әрекет еттік. Ең бастысы қызға жету болды. Пәтерге кірсем, ол ес-түссіз жатыр екен, ал өрт кез келген кезде лаулауы мүмкін еді. Үлгергеніміз жақсы болды", - деді Алматы қаласы ПД ЖПҚБ патрульдік полиция полкінің аға инспекторы Жармұханбет Ибатдолда.
Алматы қалалық полиция департаментінің басшылығы патрульдік полиция қызметкерлеріне жеделдігі, батылдығы және антына адалдығы үшін алғысын білдірді.