Аргентина астанасы Буэнос-Айрестің іргесіндегі элиталық аудан – Нордельтада капибаралар нағыз «қожайынға» айналып барады. Жергілікті тұрғындар үшін олар сүйкімді жануарлар емес, нағыз мәселеге айналған. Бұл туралы Guardian басылымы жазды.
Кейінгі екі жылда капибаралардың саны 1000-нан асып, олар гүлдерді жеп, иттермен төбелесіп, тіпті жол бойында жататын болған. Кейбіреулер үшін бұл күлкілі көрініс болса, тұрғындар үшін – күнделікті күйзелістің көзі.
Капибаралар – әлемдегі ең ірі кеміргіштер. Олар бейбіт әрі баяу тіршілік ететін жануарлар ретінде танылғанымен, қазіргі ахуал жергілікті халықты алаңдатып отыр.
Мәселенің түп-тамыры – урбанизацияда. Бұрын бұл аймақ капибаралардың табиғи мекені – батпақты өңір болған. Алайда соңғы жылдары бұл жерлерге элиталық үйлер мен инфрақұрылым салынып, жануарлардың мекені тарылып қалған. Енді олар өз құқықтарын «қайтарып жатқандай».