Осы аптада Президент жанындағы Орталық коммуникациялар қызметінде 2025 жылғы өрт қауіпсіздігіне дайындық бойынша қабылданып жатқан іс-шаралар туралы брифинг өтті.
Өртке қарсы қызмет комитетінің төрағасы Ерлан Төрегелдиев өрт болу қаупі күшейген кезеңінің басталғандықтан, әкімдіктермен және басқа да уәкілетті органдармен бірлесіп табиғи өрттердің алдын алу және халықты қорғау жұмысына даярлық туралы хабарлады. Атап айтсақ, Экология министрлігімен бірлесіп ведомствоаралық жоспар бекітілген, шекаралас мемлекеттермен өзара іс-қимылдарға түзетулер енгізілген.
Бұл бағытта өңірлерде профилактикалық іс-шаралар кешені жүргізіледі. Мәселен, аумақты тазарту және жер жырту жұмыстары жалғасуда, сондай-ақ орманды дала алқаптарында профилактикалық жұмыстар белсенді жүргізілуде. «Қазгидрометтің» болжамына сәйкес алдағы жаз құрғақ болады деп күтілуде, бұл табиғи өрт қаупін еселейді.
Бүгінге дейін 34 табиғи өрт пен 405 құрғақ өсімдік өрті тіркелді. Оның негізгі себебі – адам факторы болып отыр. Шөпті рұқсатсыз жағу және отты абайсыз пайдаланудың соңы өртке ұласуда дейді мамандар.
Полиция мен жергілікті атқарушы органдардың қатысуымен күнделікті рейдтер ұйымдастырылып жатыр. Өрт қауіпсіздігі ережелерін бұзған 475 адам әкімшілік жауапкершілікке тартылған. Халыққа түсіндіру жұмыстары жүргізіліп, мектептерде қауіпсіздік сабақтары және басқа да акциялар өткізіле бермек.
ТЖМ Командалық орталығында тәулік бойы жедел топ жұмыс істейді. «Орман», «Табиғат» ақпараттық жүйелерінің, бейнебақылау, космомониторинг көмегімен өрт ошақтарын ерте анықтауға ерекше назар аударылады.
Орман алқаптары бар өңірлерде ТЖМ әуе кемелері мен табиғат қорғау ведомстволарының кезекшілігі ұйымдастырылады. Пилотсыз ұшу аппараттары да белсенді пайдаланылады, күн сайын әуеден шолу жұмыстары жүргізіледі.
Мамыр айында авиацияны қатыстыра отырып, Республикалық командалық-штабтық оқу-жаттығулар, сондай-ақ өрт сөндіру бекеттері және ерікті өрт сөндіру құралымдарымен өрт-тактикалық оқу-жаттығулар өткізіледі.
Төтенше жағдайлар министрлігі азаматтарды табиғат аясында өрт қауіпсіздігі ережелерін қатаң сақтауға шақырады.