Ғалымдар шайдың тағы бір пайдасын анықтады

АҚШ ғалымдары шайдың адам денсаулығына тигізетін тағы бір жаңа қырынан ашты. Зерттеу нәтижелеріне сәйкес, шай жапырақтары судан ауыр металдарды, соның ішінде қорғасынды сүзіп, олардың мөлшерін азайта алады.

Зерттеушілер жасыл, қара, улун, ақ шай, сондай-ақ түймедақ пен ройбушты сынақтан өткізді. Олар бұл шайларды құрамында белгілі мөлшерде қорғасын, хром, мыс, мырыш және кадмий бар сумен 85°C температурада демдеді. Нәтижесінде бір шыны шайды демдеу судан қорғасынның 15%-ын жоя алатыны анықталды.

«Шай жапырақтарының беткі қабаты кең, бұл олардың судан зиянды элементтерді сіңіруіне мүмкіндік береді», – деді зерттеудің жетекші авторы, докторант Бенджамин Шиндель.

Ғалымдардың айтуынша, қара шай ауыр металдарды сіңіру жағынан сәл тиімдірек. Сонымен қатар, ұсақталған шай жапырақтары металдарды жақсырақ сүзеді, ал шайды ұзақ уақыт демдеу бұл процесті одан әрі күшейтеді.

Зерттеу барысында шай пакеттерінің де рөл атқаратыны анықталды. Целлюлозадан жасалған шай пакеттері ауыр металдарды ұстауға көмектессе, мақта мен нейлоннан жасалғандары ондай әсер көрсетпейді.

Шайдың бұл жаңа қасиеті оның жүрек-қан тамырлары жүйесіне оң әсері мен нейродегенеративті аурулардың алдын алу қабілетіне қосымша артықшылық ретінде қарастырылуда.

«Адамдар күніне бір шыны шайды артық ішсе, ауыр металдардың ағзаға әсеріне байланысты аурулар саны азаюы мүмкін», – деді Шиндель.