Ізет пен ілтипат – бірліктің бастауы

1 наурыз – Қазақстан халқы ас­сам­блея­сының құрылған күні, яғни еліміз­дегі сан түрлі ұлттың татулығы мен бір­лігінің симво­лына айналған күн. Кейіннен бұл дата Алғыс айту күні ре­тінде мере­келер тізіміне қосылды. Осы­лайша, 2016 жылдан бері көк­тем­нің ал­ғашқы күні ілтипат пен ізет, алғыс пен құрмет арқалап келеді.

Владимир Чепел:

Барлығы татулық пен сыйластықтың арқасы

– Қазақ халқы талай ауыр сынақтан өтті: со­ғыс, ашаршылық, қуғын-сүргін сияқты азап­ты күндерді басынан кешірді. Соған қа­ра­мастан, тілі бөлек, діні басқа, тағдыр тәл­кегіне ұшыраған, басына қара бұлт үйі­ріл­г­ен қаншама өзге ұлт өкіліне пана болып, олар­ға қолдау көрсетті. Қиын-қыстау заман­да өзі аштық пен жұттан зардап шексе де, жа­нашырлық танытып, тағдырластарын құ­шақ жая қарсы алды. Бұл – қазақ хал­қы­ның кең жүректі, бауырмал әрі дархан ха­лық екенін айғақтайды. Сол үшін де алғысым шек­сіз! Алғыс айту күні – елдің бірлігін нығай­тып, ортақ тарихымызға тағзым ететін ерек­ше мейрам. Бұл күн – ең алдымен, қазақ же­рі мен халқына деген алғысымызды білді­ре­тін сәт. Бүгінде бейбіт аспан астында, ты­ныш заманда өмір сүріп жатқанымыз – сол бір­ліктің, сыйластықтың, бір-бірімізге көр­сеткен қолдаудың арқасы.  Сондықтан да, қазақ халқына деген ри­за­шылығымыз шексіз. Әрбір өзге ұлт өкілі осы­лай ойлайды деп есептеймін. Ынтымақ пен татулық бар жерде – береке мен ырыс, дос­тық пен сыйластық салтанат құрады. Елі­міздің ынтымағы мәңгі жасасын, бауыр­мал қазақ еліміз аман болсын!

Дэниел Джеймс:

Бір ауыз жылы сөз жанға  демеу болады

– Алғыс айту күні – мен үшін ерекше мән­ге ие мереке. Бұл күн жақсылықты баға­лап, өткенге құрмет көрсетіп, айналамыздағы адам­дарға шынайы ризашылығымызды біл­діруге мүмкіндік беретін сәт. Қазақстанда сан түрлі ұлт өкілдері бір-біріне қолдау көр­сетіп, ортақ тарихымыздың ажырамас бөлі­гіне айналған. Сондықтан бұл мереке – тек алғыс айтудың ғана емес, ел ішіндегі бірлікті, достықты және татулықты нығайтудың сим­волы. Бұл күннің қоғамға тигізер әсері зор деп ой­лаймын. Себебі алғыс айту адамдарды жа­­­қындастырып, мейірімге, ізгілікке шақы­ра­ды. Жылы сөз жүректі жылытып қана қоймай, көңіл-күйді көтеріп, жан-дүниеңе шуақ сыйлайды. Біз жақындарымызға шын жүректен алғыс білдіру арқылы өзімізді де ру­хани тұрғыдан байытамыз. Алғыс – тек ри­зашылық белгісі ғана емес, ол адамның ішкі мәдениеті мен адамгершілік деңгейінің көрінісі. Мен үшін бұл күн – жақындарыма жү­рек­жарды алғысымды білдіріп, айналамдағы жандардың еңбегін бағалауға тамаша мүм­кін­дік. Көбінесе қарапайым «рахмет» деген сөз болмашы нәрсе сияқты көрінуі мүмкін, алай­да оның әсері орасан. Кейде бір ауыз жылы сөз жанға демеу болып, адамның өмірге деген көзқарасын өзгертеді. 

Евгений Кравчук:    

Бұл тек бір күндік  мереке емес

Алғыс айту күнінің идеологиялық мәні зор. Өйткені қазақ халқы сан түрлі ұлт өкіл­де­рін бауырына басып, оларды туғанындай қа­былдады. ХХ ғасырдың ауыр кезеңдерінде Қа­зақстанға жер аударылған мыңдаған адам­­ды қазақ халқы құшақ жая қарсы алып, өз на­нын бөлісті, бар жылуын сыйлады. Осы сәт­тен бастап қазақ халқының қонақжай­лы­ғы бүкіл әлемге үлгі бола алды. Бұл қасиет – халқымыздың ең басты құндылықтарының бірі.   Мен қазақ халқына шексіз алғысымды біл­діремін. Бұл тек бір күндік мереке емес, ке­рісінше, өз тарихымызға, халқымыздың кең пейілі мен адамгершілігіне деген құр­мет­тің белгісі.  Жалпы, бұл күннің қоғамға тигізер әсері ерекше. Себебі алғыс айту – адамдарды жақындастырады, олардың арасындағы сыйластықты күшейтеді. Күнделікті өмірде де әрбір жанға алғыс айтуды ұмытпауымыз керек. Ал алғыс айту күні – соның маңызын еске салатын ерекше күн. Бұл мейрам жүрек­терге жылу сыйлап, адамдарды мейірімге же­телейді. Осы күннің мәнін түсініп, алғыс ай­тып жүрудің мәні зор.