Солтүстік Қазақстанда жаңа зауыт іске қосылды

Зауытқа 34 млрд теңге инвестиция құйылып, толық қуатына шыққанда 220 жұмыс орны ашылады.

Петропавлда майлы дақылдарды өңдейтін «Масло-Дел» серіктестігінің майды экстракциялау зауыты іске қосылды. Бұл туралы СҚО әкімдігі мәлімдеді.

Жобаға 34 млрд теңге инвестиция құйылып, толық қуатына шыққанда 220 жұмыс орны ашылады. Бюджетке 3,2 млрд.тг салық құяды. 

Жаңа кәсіпорын жылына 400 мың тоннаға дейін майлы дақылдарды өңдей алады. Өндіріс толықтай автоматтандырылған және қалдықсыз жұмыс істейді, заманауи еуропалық жабдықтармен қамтылған. Зауыттың өнімі -  күнбағыс, рап және зығыр майы, сондай-ақ күнжара мен шрот. 

Ашылған күннен бастап 10 мың тонна тазартылмаған күнбағыс майы өндірілді. Көктемде экстракция желісі іске қосылса, жыл соңына дейін тамақ өнеркәсібінде сұранысқа ие лецитин өңдеу цехы ашылады. 

"Кәсіпорын шикізатты жергілікті диқандардан сатып алады, бұл өңірдің жоғары әлеуетін көрсетеді. Биыл әртараптандыру аясында майлы дақылдардың егіс алқабы 85 мың гектарға ұлғайтылып, 760 мың гектарға дейін жетті", - деп атап өтті өңір басшысы. 

Жаңа зауыттың арқасында өңір барлық өнімді өңдеуге мүмкіндік алды. Айта кетсем, былтыр СҚО-да 780 мың тонна майлы дақыл жиналса, бүгінде өңдеу кәсіпорындарының жалпы қуаты жылына 811 мың тоннаны құрайды.