ШҚО ауданында компьютерлік томография кабинеті ашылды

Шығыс Қазақстан облысы Тарбағатай аудандық ауруханасында заманауи компьютерлік томография (КТ) аппараты жұмыс істей бастады. Бұл – аудан тұрғындары үшін жағымды жайт, себебі бұған  дейін ауыл тұрғындары диагностикадан өту үшін 400 шақырым жол жүріп, облыс орталығына баруға мәжбүр болатын.

Бұл аппарат «AMANAT» партиясының сайлауалды бағдарламасы аясында ауыл халқына сапалы медициналық қызмет көрсету мақсатында алынды. Жапонияның Canon Medical Systems Corporation компаниясы шығарған құрылғы секундына 160 кескін жасап, адамның бүкіл ағзасын зерттеуге мүмкіндік береді. Әсіресе, инсульт, бас-ми жарақаттары сияқты шұғыл жағдайларда жылдам әрі дәл диагноз қоюға көмектеседі. Бұл өз кезегінде дер кезінде емдеуді бастап, науқастың өмірін сақтап қалуға, мүгедектікке жол бермеуге ықпал етеді.

Аудан тұрғындары медициналық қызмет сапасын арттыру бойынша бірнеше рет өтініш білдірген болатын. Енді бұл мәселе оң шешімін тауып, жаңа аппарат іске қосылды.

«Шалғай ауылдардағы медицина саласындағы осындай жетістіктер – өте қуанышты жаңалық. Басты мақсатымыз – халыққа сапалы әрі қолжетімді медициналық қызмет көрсету. Бүгінде кабинетте тексерілген 8 науқасқа компьютерлік томография арқылы диагностика жасалды. Алдағы уақытта аудандық ауруханада инсульт орталығын және интервенциялық хирургия бөлімін ашу жоспарланып отыр», – дейді Тарбағатай аудандық ауруханасының бас дәрігері Елжан Манарбеков.

Аппараттың құны 450 млн теңгеден асады. Оны орнату үшін ауруханада арнайы кабинет толық жабдықталды.

«Біздің партия шалғай елді мекендердегі азаматтардың сапалы медициналық қызметке қол жеткізуін басты назарда ұстайды. Осыған орай, Тарбағатай тұрғындарының өтініші орындалып, компьютерлік томография аппараты іске қосылды», – деді ШҚО мәслихатының депутаты Болат Нұрпейісов.