«Алматы Арена» мұз сарайында өрт шығып, 4 бала құтқарылды

Өрт сөндірушілер өрттің іргелес орын-жайларға таралуына жол бермей оны 40 шаршы метр аумақта сөндірді

Алматыдағы «Алматы Арена» мұз сарайының кіші залынан өрт шықты, деп хабарлады Төтенше жағдайлар министрлігі.

“Алматы қаласындағы жабық мұз айдынының кіші залының бірінші қабатында спорттық инвентарь өртенді. Өрт сөндіру бөлімшелері келгенге дейін келушілер мен қызметкерлер ғимараттан шығып кеткен”, – делінген хабарламада.

Газ-түтіннен қорғау қызметінің буындарымен барлау және өртті сөндіру барысында құтқару қалпақтарының көмегімен 2013, 2016, 2019 және 2012 жылы өмірге келген төрт бала құтқарылды.

Өрттің ауқымдылығына қарамастан, өрт сөндірушілер өрттің іргелес орын-жайларға таралуына жол бермей оны 40 шаршы метр аумақта сөндірді.