Қарағандыда жабылған жол учаскелерінде жүздеген көлік кептелісте тұрып қалды

Көктайғақ пен жаңбыр салдарынан барлық көлік түрлеріне жол жабылды

Қарағанды облысының Теміртау қаласындағы терминал маңында шамамен 300 көлік жиналды. Мұнда Астана – Қарағанды – Алматы автожолының кейбір учаскелері жабылған.

«ҚазАвтоЖол» мәліметінше, Астана – Қарағанды – Алматы автожолының бірнеше учаскесі жабық: Ақмола облысындағы «Жібек Жолы» ауылынан Теміртауға дейінгі аралық, сондай-ақ Қарағанды облысындағы Ақсу – Аюлы – Балқаш учаскелері.

«Көктайғақ пен жаңбыр салдарынан барлық көлік түрлеріне жол жабылды. Теміртау терминалында шамамен 300 көлік тұр. Колонналарды алып жүру бойынша жұмыстар ұйымдастырылуда», – деп хабарлады Қарағанды облысы патрульдік полиция батальонының командирі Медет Нұрмұханов.

Синоптиктердің алдын ала ескертуінше, Қарағанды облысында жауын-шашын (жаңбыр мен қар), боран және көктайғақ күтіледі. Таңертең аймақта тұман болуы мүмкін. Желдің жылдамдығы екпінді сәттерде секундына 23 метрге дейін жетеді.