Қазақстанның Мемлекеттік күзет қызметі ҰҚШҰ Қауіпсіздік кеңесінің алдағы отырысына байланысты астаналықтарға үндеу жасады.
Ведомствоның хабарлауынша, 27-28 қарашада шет мемлекеттер басшыларының қатысуымен ҰҚШҰ Ұжымдық қауіпсіздік кеңесінің отырысына дайындық аясында Астана көшелерінің жекелеген бөлігінде көлік қозғалысына уақытша шектеулер енгізіледі.
Негізгі шектеулер:
- «Есіл» (Оңтүстік айналма жол, Қабанбай батыр, Мәңгілік Ел, Ұлы Дала даңғ., Достық, Керей-Жәнібек хандар к-рі.);
- «Нұра» (Тұран, Ұлы Дала даңғ.);
- «Алматы» (Тәуелсіздік даңғ., Ж.Нәжімеденов, Қ.Аманжолов к-рі.) аудандарына қатысты болады.
«Әзірлік шараларында Қазақстан Республикасы арнаулы мемлекеттік, құқық қорғау органдары мен Қарулы күштері ресурстарын, оның ішінде әскери авиация мен техниканы пайдалану көзделген. Сонымен қатар 27 қарашада Астана қаласы аспанында Қорғаныс министрлігі майдан авиациясының ұшуы жоспарланған», - делінген ведомство хабарламасында.
Ведомство өкілдері Астана тұрғындары мен қонақтарын жүргізіліп жатқан қауіпсіздік шараларына түсіністікпен қарауға шақырды.