Арбаға таңылсақ та команда болып жүгіреміз – марафоншы Нұрлан Сыздықов

Командада сал ауруына шалдыққан, диагнозы ауыр жандар, балалар бар.

Кеше «AMANAT» партиясының қолдауымен, Қазақстан мүгедектер конфедерациясының ұйымдастыруымен «ЖанШуақ» қоғамдық марапаты табысталды. «Кедергісіз келешек» жобасының аясындағы бұл шара «осымен 17-ші рет өткізіліп отыр. Жыл сайын қоғамдық қызметте ерекше нәтижесімен көзге түскен мүмкіндігі шектеулі жандарға берілетін бұл сыйлықты кеше иеленгендердің бірі – Сыздықов Нұрлан Зиядденұлы. «Мүгедектігі бар адамдарға қатысты қоғамдық сананың оң өзгеруіне қосқан үлесі үшін» номинациясы бойынша марапатталған Нұрлан Сыздықов – Астана қаласының Алматы ауданы әкімінің инклюзив жөніндегі штаттан тыс кеңесшісі, ерекше қажеттілігі бар адамдарға арналған көп жарыстың қатысушысы әрі ұйымдастырушысы.

«Өзім – Қостанайдың тумасымын. Он жылдан бері Астанада тұрамын. Қазір жасым 31-де. Осыдан тоғыз жыл бұрын, 22 жасымда жол апатына түсіп, арбаға таңылдым. Жүгірсем деген талпыныс болды. Сөйтіп алғаш рет 21 шақырымға жалғасқан марафонға қатыстым. Соңғы үш жылда 5-7 адамнан тұратын команда жасақтап, жарыстарға шығарып жүрмін. Командада сал ауруына шалдыққан, диагнозы ауыр жандар, балалар бар.  Командамен 10 шақырымдық марафондарға қатысамыз. Сол жобамен «ЖанШуақ» марапатына іліктім. Мені елеп-ескерген, назарынан тыс қалдырмаған жоба ұйымдастырушыларына ризамын.  Мамандығым – заңгер. Параалимпиада орталығында әкімші, Астана әлеуметтік технология қоғамында фандрайзер болып жұмыс істеймін. Жұмысқа көлігіммен, өзім келіп кетемін. Арбамды көлігіме салып аламын, көлікке өзім отырамын», – дейді Нұрлан.