Нобель сыйлығының лауреаты ұзақ өмір сүрудің 3 сырын айтты

72 жастағы Венки Рамакришнан ғылымдағы қартаю мәселелерін зерттеп келеді. Кембридж университетінің микробиологы, рибосомалар саласындағы зерттеулері үшін Нобель сыйлығының лауреаты және әлемдегі ең көне ғылыми академия – Корольдік қоғамның бұрынғы президенті қартаюдың алдын алуға қатысты маңызды кеңестерін бөлісті.  

Рамакришнанның «Неліктен біз өлеміз?» атты жаңа кітабында қартаюға қатысты 300 мыңнан астам ғылыми мақаланың соңғы он жылда жарық көргені және 700-ден астам стартаптың бұл зерттеулерге миллиардтаған доллар инвестиция салғаны жазылған. 

Ғалым қартаю себептерін зерттеуде нақты ғылыми жетістіктер болғанын айтады. Алайда қартаюға қарсы дәрілерді жасап шығару немесе оны емдеуге арналған әдістерді іске қосу әлі күнге дейін мүмкін болмай отыр.  

2020 жылы қартаюдың алдын алуға арналған әдістер нарығы 25,1 миллиард долларға бағаланған, ал 2030 жылға қарай бұл көрсеткіш 44,2 миллиард долларға жетуі мүмкін. Бірақ көптеген биохакинг әдістері, мысалы, озонотерапия немесе NAD+ сияқты ұзақ өмір сүруге арналған қоспалар, қатаң клиникалық сынақтардан өтпейді және денсаулыққа пайдасы дәлелденбеген.  

Рамакришнан ұзақ өмір сүру үшін үш қарапайым кеңес ұсынады: 1. Қоректік тағамды қалыпты мөлшерде тұтыну. 2. Күн сайын велосипед тебу.   3. Күніне 8 сағат ұйықтау.

Ғалымның пікірінше, ғылым мен зерттеулерге негізделген деректерге сүйену маңызды. Ол ұзақ өмір сүруге қатысты тым артық насихатталған идеяларды сынаса да, қартаю туралы зерттеулердің пайдалы екенін айтып өтті.

Мен ұзақ өмір сүруге бағытталған ғылымға қарсы емеспін, бірақ бұл салада пайда табуды көздейтін компаниялар көп, – дейді Рамакришнан.