БҚО-да алаяқтықпен айналысқан ірі қылмыстық топ ұсталды

Қазіргі уақытта қылмыстық іс бойынша қажетті тергеу амалдары жалғасып жатыр.

Батыс Қазақстан облысында интернет-алаяқтықпен айналысқан ірі топ қылмыс үстінде ұсталды, деп хабарлады turkystan.kz polisia.kz-ке сілтеме жасап.

Прокуратураның үйлестіруімен жүргізілген арнайы жедел тергеу іс-шаралары барысында Қызылорда облысының полиция қызметкерлері республика көлемінде интернет алаяқтықпен айналысып, жәбірленушілерге аса ірі мөлшерде зиян келтірген, Батыс Қазақстан облысында орналасқан қылмыстық топты құрықтады.

Тергеу барысында айғақ заттар ретінде 16 телефон, бірнеше қолданылған SIM-карталар, Роутер құрылғысы және 3,5 млн теңге көлемінде ақша тәркіленді.

Күдіктілер Қызылорда облысының әлеуметтік желі пайдаланушыларына «несие тарихын жаңғыртып, ақша алуға арналған бағдарлама жасаймыз» деген жалған ақпарат таратып, өздерінің интернеттегі IP-мекенжайларын және банктік есепшоттарын бүркемелеп, жәбірленушілерден жалпы сомасы 45 млн теңге қаражатты алаяқтық жолмен жымқырғаны үшін айыпталуда. Соттың шешімімен күдіктілерге екі ай мерзімге «күзетпен ұстау» бұлтартпау шарасы тағайындалды.

Қазіргі уақытта қылмыстық іс бойынша қажетті тергеу амалдары жалғасып жатыр.